Azatlıq Radiosınıñ Qırım.Aqiqat leyhasınıñ jurnalistleri 2014 senesi Rusiye tarafından işğal etilgen Qırım yarımadasında 220-den ziyade Rusiye arbiy obyektini köstergen bir haritanı yayınladılar.
Bu obyektler arasında infraterkibi olğan arbiy uçaq alanları, gemilerniñ ve katerlerniñ yerleştirilmesi mıntaqaları ve yerleri, vesiqalar, silâ, erzaq mağazları, arbiy şeerler, arbiy qısımlar, kazarmalar, ştablar ve idare noqtaları, arbiy tehnika parkları ve ava mudafaası sistemalarınıñ nevbetçilik yerleri, poligonlar ve oqutuv merkezleri, arbiy ve sanayı kompleksiniñ bazı işhaneleri.
Doğru koorldinatlar ve fotosüretler ile bütün bu malümat mayısnıñ 10-nda saba Qırım.Aqiqat ve Azatlıq Radiosı tarafından yayınlanğan interaktiv bir haritağa yerleştirlgen. Harita Qırım.Aqiqat, Azatlıq Radosınıñ "Shemı" leyhasınıñ jurnalistleri, Qırımdan frilanserler, arbiy ekspertler ve RFE/RL Merkeziy haber hızmetiniñ mütehassısları tarafından azırlanğan. O, Azatlıq Radiosı ve Qırım.Aqiqat saytlarında ukrayin ve rus tillerinde yayınlanğan.
"Oquyıcılarımıznı Qırım yarımadasınıñ arbiyleştirilmesiniñ seviyesi aqqında haberdar etmek bizim içün pek müimdir. Qırım sakinlerini bu yerler ile bağlı telükeler aqqında tenbiyyelemek isteymiz. Çünki pek çoq adam RF arbiy obyektleriniñ yaqınlarında yaşay. Rusiyeniñ Ukrayinağa qarşı kerçekleştirgen arbiy areketlerni köz ögüne alıp, bu yerler adamlar içün pek telükelidir", - dedi haritanıñ müellifi, Qırım.Aqiqat jurnalisti İgor Tokar.
"Shemı" leyhasınıñ jurnalisti Kırılo Ovsânıynıñ sözlerine köre, bu harita işğal altındaki Qırımda kerçekten neler olğanını köstergen Planet Labs-nıñ 2023 yıl içün eñ aktual yoldaş süretlerinden tizilgen. Olarnıñ üzerinde Rusiye Mudafaa nazirligi ve diger küç hızmetleri ile bağlı olğan arbiyler ve diger öbektler qayda olğanını ve ne kibi telüke taşığanını tafsilâtlı körmek mümkün.
Daa evel Ukrayina Mudafaa nazirliginiñ Baş istihbarat idaresiniñ temsilcisi Andriy Yusov, Qırım sakinlerini "yaqın kelecekte arbiy obyektler ve tecavuzcınıñ ordusını temin etken obyektlerinden uzaq turmağa" çağırğan edi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Qırım yarımadası, 2014 senesi qanunsız işğalden soñ Rusiye tarafından arbiyleştirildi. Ukrayina, Qırım ile beraber işğal etilgen bütün topraqlarını azat etecegini bildire.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
