2018 senesi işğal etilgen Qırımda şartlı apis cezasını alğan ve açıq faaliyeti yasaqlanğan qırımlı jurnalist, Qırım.Aqiqat müellifi Mıkola Semena Rosfinmonitoring tizgen terrorist ve ekstremistler cedvelinden çıqarıldı.
Bu aqta cedvelniñ «çıqarılğanlar» bölüginde yazıldı, dep bildire Gratı.
Ukraina Yuqarı Radasınıñ İnsan aqları vekâletlisi Lüdmila Denisova, Semenanen körüşti, dep bildirdi. Onıñ aytqanına köre, körüşüvde Semenanıñ sağlıq vaziyeti ve oña vaqtınca berilecek mesken meselesi muzakere etildi. Semena Qırım.Aqiqatqa izaat berip, oña vaqtınca ev berilecek, dep vade etildi, amma «tafsilâtlı bir şey şimdilik belli degil», dedi.
Qırımlı jurnalistniñ advokatı Aleksandr Popkov, Semenanıñ imaye tarafı onı şartlı apis cezasına üküm etken ve açıq faaliyetini yasaqlağan Aqmescitteki Rusiye mahkemesiniñ qararını Avropa insan aqları mahkemesine şikâyet etti, dep bildirgen edi.
Semena, davası Avropa insan aqları mahkemesinde buluna, onı qabul ettiler, faqat şahsiy davalar Ukrainanıñ Rusiyege qarşı Qırım davası baqılacaq vaqıtqa qaldırıldı, dep bildirgen edi.
2018 senesi sentâbr ayında Avropa insan aqları mahkemesiniñ Mıkola Semenanıñ Qırımdaki Rusiye mahkemesiniñ qararına qarşı bergen şikâyet arizasını prioritetli baqmağa red etkeni belli oldı.
Yanvarniñ 28-nde Semena sınav müddetiniñ vaqtından evel toqtatılğanı ve mahkümiyetiniñ lâğu etilüvine dair qararnı aldı.
Fevralniñ 18-nde Mıkola Semena Rusiye işğal etken Qırımdan esas Ukrainağa tedaviylenmege yol aldı. O, Kyivde tibbiy teşkerüvden keçmek, soñra jurnalist faaliyetine devam etmek niyeti aqqında tarif etti.
