"Serbest Qırımğa mektüpler" teşebbüsi çerçivesinde Qırım.Aqiqat frilanseri ve sabıq Kreml mabüsi Vladislav Yesipenko, Qırımdaki Rusiye mahkemesi tarafından "devlet hainligi" maddesine istinaden 12 yılğa azatlıqtan marum etilgen Galina Dovgopolağa yazğan mektübini oqudı. Bu aqta prezidentniñ Qırım Muhtar Cumhuriyetindeki temsilciligi bildire.
Vladislav Yesipenko ve Galina Dovgopola işğal etilgen Aqmescitniñ 1-inci SİZO-sında beraber bulunğan edi.
"Bu vaqıt devamında olar pek yaqın oldılar — Vladislav Galinağa qardaşım dep ayta ve olarnıñ beraber keçirgen sıcaq yaz künlerini hatırlay, o vaqıt olar kamera qapularınıñ açıq "kormuşkaları" vastasınen laf ete ediler. Şimdi, azatlıqta bulunğan Vladislav Yesipenko, azat Ukrayinada tekrar körüşmek ümüti ile arqadaşına mektüpler yaza", — dep aytıla haberde.
Evel, Yesipenko, Dovgopolovanıñ bulunğan koloniyasına barıp kelgen insanlarğa atıf etip, qadınnıñ sağlıq vaziyeti fenalaştı, dep bildirgen edi.
Vladislav Yesipenko "Qırım.Aqiqat" leyhasınıñ jurnalisti. O, Qırımdaki içtimaiy ve ekologik meselelerni aydınlata, soqaq soravlarını ve işğal etilgen yarımadada ayat aqqında reportajlarnı çıqara edi. 2021 senesi saban ayınıñ 10-nda Rusiye FSB-sınıñ hadimleri tarafından Ukrayina mahsus hızmetleri içün malümat toplağanında ve maşnasında "öz başına yapılğan patlav cihazını" saqlağanında qabaatlanıp tutulğan edi.