Rusiye nezaretinde olğan Aqmescit rayon mahkemesi Azatlıq Radiosınıñ (Qırım.Aqiqat leyhası) frilanseri Vladislav Yesipenkonıñ tevqif müddetini altı ayğa devam etti. Bunı Qırım.Aqiqat mühbiri haber etti.
Yesipenko tevqif müddeti 2022 senesi qara qış ayında soñuna kelgenine baqmadan SİZO-da bu seneniñ dekabrniñ 18-nece qalacaq. Advokatlar bunı şimdilik tefsir etmey.
Mahkeme oturışı qapalı olıp keçti.
Bugün Kyivde Vladislav Yesipenkonıñ destegine aktsiya kesirilecek. Saat 18:00-de Mustaqillik meydanında jurnalistler ve uquq qoruyıcılar toplanacaq.
Aqşam Vinnitsada da Avropa medanında aktsiya keçirilecek.
Aktsiyanıñ teşkilâtçıları Qırım uquq qoruyıcı gruppası, ZMINA insan aqları merkezi ve Ukrainanıñ jurnalistler birligi.
Martnıñ 16-nda Rusiye FSBsiniñ cemaat alâqaları merkezi, martnıñ 10-nda Qırımda Vladislav Yesipenko «Ukraina mahsus hızmetleriniñ menfaatları içün» malümat toplağanı sebebinden tutuldı, dep bildirdi.
FSB bildirgenine köre, Yesipenko Qırımda yaşayış ve insanlar toplaşqan yerlerniñ foto ve videolarını çıqarğan edi. Mahkeme onı Qırımda apiske aldı.
Müessise, Yesipenkonıñ şaatlığına esaslana. O, «Ukraina Tış istihbarat hızmetiniñ 5-inci departamenti 8-inci yedeginiñ zabiti polkovnik Kravçuk V.A. emrinen Ukraina mahsus hızmetleriniñ menfaatları içün malümat topladı ve onıñ tevsiyesinen telükesizligini qorumaq içün maşinasında el yapılğan patlayıcı cihaznı saqladı», dep aytqan eken. Kreml kontrolindeki mahkeme Yesipenkonı mayısnıñ 11-ne qadar apiste qaldırdı.
Ukraina Tış istihbarat hızmeti, FSBniñ Vladislav Yesipenkonıñ Ukraina mahsus hızmetleri ile işbirligi aqqında malümatını Qırım.Aqiqatqa aytıp, «Rusiye mahsus hızmetleriniñ provokatsiyalarını izaatlamay», dep bildirdi.
«Qırım işğaliniñ yılı arfesinde bu propaganda aktsiyası – ealiniñ diqqatını yarımadanıñ iç problemlerinden uzaqlaştırmaq içün yahşı bir manaçıqtır», – dep qoştı Ukraina Tış istihbarat hızmetiniñ matbuat hızmeti.
Qırım Muhtar Cumhuriyetiniñ prokuraturası, Ukraina uquq qoruyıcıları Qırımda Vladislav Yesipenkonıñ tutuluvı ve apiske alınması sebebinden cinaiy tahqiqat başlattı, dep bildirdi.
Ukraina Tış işler nazirligi Qırımda tutulğan Vladislav Yesipenkonen mustaqil advokatnı körüştirmege talap ete.
