Qırım cemaatçıları Rusiye kontrolindeki yarımada akimiyetine muracaat etip, yarımadada yerastı suvlarnıñ vaziyetini bilmege planlaştıra. Bu aqta Qırım.Aqiqat mühbiri bildire.
Bu qararnı cemaatçılar sentâbrniñ 25-nde Qarasuvbazarda keçirilgen «Medeniy başlar – suv başları» konferentsiyasında qabul etti. Tedbirni «Serbest Qırım» cemaat areketi ve Qırımnıñ medeniy mirasını saqlav teşebbüs gruppası teşkil ettiler.
Cemaatçılarnıñ aytqanına köre, Qırımnıñ yerastı suvlarınıñ vaziyetine dair resmiy malümat yoq.
«Medeniy mirasnen beraber Qırımnıñ suv mirasına da diqqatnen yanaşmalımız. Laf ilk evelâ yüz yıllarnen toplanğan yerastı suvlar aqqında kete. Malüm ki, beş yıldan berli bu yedekler qullanıla. Şimdi vaziyeti ne? Bu aqta resmiy malümat yoq. Şu sebepten konferentsiyada Qırımnıñ Rusiye akimiyetine Qırımnıñ yerastı suvlarınıñ vaziyetine dair malümat talabı ile muracaat etmek qararı qabul etildi», – dep bildirdi Qırım.Aqiqat mühbirine «Serbest Qırım» areketiniñ faali Reşad Memetov.
Rusiye kontrolindeki Aqyar akimiyeti şeerniñ suv teminleviniñ vaziyeti qıyın olğanını tanıdı ve daa üç yerastı quyunı qullanmağa qarar aldı.
2018 senesi sentâbr ayında Qırımnıñ Rusiye akimiyeti eali içün içme suvı yetmegenini bildirdi.
Ukraina Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminley edi. 2014 senesi Rusiye Qırımnı işğal etken soñ, yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
