Qırım akimiyeti avgustnıñ 13-nde fevqulâde vaziyetlerniñ ögüni aluv ve yoq etüv komissiyasınıñ toplaşuvını keçirip, yarımadada iyünniñ soñunda – iyülniñ başında yarımadada olğan suv basuvlarnen bağlı adiselerge «federal seviyede fevqulâde vaziyet» statusını bermege qarar aldı.
Bu aqta Qırımnıñ Rusiye yolbaşçısı Sergey Aksenov bildirdi.
«Umumen suv köterilüvi neticesinde 43 meskün yerini suv bastı. 524 mustaqil ev, 136 çoq daireli ev ve içtimaiy emiyeti olğan 74 obyektni suv bastı. Yaramay ava neticesinde 30 köpür zarar kördi, 72 km çoq maşina yolu zarar kördi», – dep aytıla Aksenovnıñ haberinde.
Onıñ malümatına köre, zarar körgen insanlarnıñ sayısı 4082 oldı, ekisi elâk oldı, bir kişiniñ bulunğan yeri alâ daa belli degil ve daa 59 insannıñ sağlığı farqlı seviyede zarar kördi.
Aksenovnıñ malümatına köre, zarar körgenlerden 867-siniñ mülki qısmen yoq oldı ve daa 1692 insan mülkini bütünley coydı. Umumen tahminen 3500 insan bir kerelik maddiy yardım aldı.
Devamlı qurğaqlıqtan soñ Qırımda bu yaz sellerniñ sebebi olğan sağanaqlar yağdı. Eñ çoq iyün ve iyül aylarında Yalta ve Keriç zarar kördi.
Avgust ayında Qırımnıñ şarqiy regionlarını küçlü yağanaqlardan soñ kene suv bastı.
Avgustnıñ 13-nde saba Keriçniñ merkeziy soqaqlarını suv bastı. Keriç yolbaşçısı vazifelerini vaqtınca eda etken Svâtoslav Brusakov Keriçniñ alçaq rayonlarında yaşağan sakinlerni tahliyege azır olmaq kerek, dep tenbiledi.
Daa evel berilgen malümatqa köre, Qırımnıñ şarqındaki Köp Kenegez (Krasnogorka) köyünde sağanaqlar neticesinde 170 azbarnı suv bastı.
Qırımdaki Rusiye Fevqulâde vaziyetler nazirliginiñ idaresi avgustnıñ 13-ne, 14-ne furtuna ihtarını ilân etti – yarımada şarqında ava bozulacaq, dep tahmin etile.
Qırımlı sinoptiklerniñ malümatına köre, şarqiy Qırımnıñ yaoısında avgustnıñ 13-nde eki metrlik dalğalar olacaq.
«Fobos» Rusiye ava merkeziniñ mütehassısı Yevgeniy Tişkovetsniñ bildirgenine köre, Qırımda sağanaqlar sebebinden «Nuh tufanı» beklenile.
