Qırımnıñ Rusiye ükümeti reisi Yuriy Ğotsanük yarımadanıñ esas Ukrainadan Şimaliy-Qırım kanalı üzerinden Dnipro suvınıñ berilmesine ihtiyacı yoq, dep bildire.
Bu şekilde o, Qırımğa suv berilmeycegini aytqan Ukraina baş naziri Denıs Şmığalniñ aytqanlarına cevap berdi.
«Bugün iç suv resurslarımıznen çare tapamız. Qırımlılar, turistler ve cumhuriyet musafirleri içme suvınen temin etildi, hususan hocalıq-turmuş ihtiyacları içün de», – dep ayttı Ğotsanük TASS Rusiye agentligine.
Qırımda suv qıtlığı sebebinden Aqmescit sakinlerini suvnen temin etken suv borusına suv artezian quyularından alınıp başlandı.
Rusiye kontrolindeki Qırım yolbaşçısı Sergey Aksenovnıñ bildirgenine köre, 2020 senesi 150 yıl içinde eñ qurğaq oldı. Mayısta Qırım suv anbarları 7,1 mln metr kubqa daa az toldı, dep bildirdi Qırımnıñ suv hocalığı komiteti.
Ukraina suv problemleri ve melioratsiya institutınıñ müdir muavini Mıhaylo Yatsükniñ fikirince, Qırım suv anbarlarınıñ yedekleri o qadar az ki, yazda yarımadada fevqulâde vaziyet ilân etilecek.
Ukraina prezidentiniñ Qırım Muhtar Cumhuriyetindeki daimiy temsilciligi, Rusiye işğal etken Qırım ve Aqyarğa Şimaliy-Qırım kanalından suv berilüvi tek yarımada işğalden qurtarılğan soñ ola bile, dep hatırlattı.
İyünniñ 11-nde Ukraina baş naziri Denıs Şmığal Kyivdeki matbuat konferentsiyasında Qırımğa Dnipro suvınıñ berilüv meselesi Ukraina kün tertibinde yoq, dep ayttı.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
