Link açıqlığı

Saatnıñ esas haberi

Qırım akimiyeti Yaltadaki forumdan soñ 1700 iş yeri peyda olacağına ümüt ete


Yalta iqtisadiyat forumı, 2019 senesi aprelniñ 19-nda
Yalta iqtisadiyat forumı, 2019 senesi aprelniñ 19-nda

Rusiye kontrolindeki Qırım akimiyeti Yalta iqtisadiyat forumında imzalanğan añlaşmalar ilhaq etilgen yarımadada 1700-den ziyade yañı iş yerini açmağa imkân berir, dep ümüt ete. Bu aqta Qırımnıñ Rusiye yolbaşçısı Sergey Aksenov cumaertesi künü, aprelniñ 20-nde, forum neticelerine köre bildirdi.

«Qırımnıñ nazirler şurası 8 mlrd rublelik añlaşmalarnı imzaladı. Umumen 1700-den ziyade iş yeri açılacaq», – dep bildire onıñ aytqanlarını «TASS» Rusiye haber agentligi.

Yaltadaki forum vaqtında Qırımnıñ Rusiye ükümeti ve Gürcistannıñ Cenübiy Osetiya separatist regionınıñ ükümeti ticariy-iqtisadiy, ilmiy-tehnik ve medeniy saalardaki işbirligi aqqında añlaşma imzalağanlar.

Frenkistan siyasetçisi Marin Le Penniñ torunı Marion Mareşal-Le Pen Yaltadaki iqtisadiyat forumında çıqışta bulundı.

Yaltadaki forum başlamazdan evel Qırım Muhtar Cumhuriyetiniñ prokuraturası çetel vatandaşlarını Rusiye ilhaq etken Qırımğa Kyiv qapatqan keçiş noqtalarından qanunsız keçüvden vazgeçmege çağırğan edi.

Aprelniñ 18-nde Qırımda Qırımnıñ Rusiye akimiyeti teşkil etken Yalta iqtisadiyat forumı başlandı. Esas tedbirler «Mriya» şifahane-kurort kompleksinde ve Alupkadaki Vorontsov sarayında keçirilecek.

XS
SM
MD
LG