10-uncı sınıf taelebeleri içün «Qırım tarihı» Rusiye dersligindeki, aq qorçalayıcılarnıñ fikirince, «qırımtatar halqına qarşı nefret doğurğan» ibarelerni kitaplarnı yañıdan neşir etmeyip, kantselâriya vastalarınen alıp taşlamağa qarar bergenler.
Bu aqta Rusiye kontrolindeki Qırım tasil nazirliginiñ adliyeci Lenura Yengulatovanıñ muracaatına bergen cevabında aytıla.
«Qırım Cumhuriyetiniñ bazı sakinleri tarafından farqlı qarşılanğan malümat saifelerini, abzatslarını kesip atmağa, yapıştırmağa, boyalamağa qarar alındı», – dep aytıla nazirlikniñ cevabında.
İşbu qarar mahsus komissiyanıñ aprel ayında keçirgen toplaşuvı neticesinde qabul etilgen eken.
«Böylece, sentâbr ayında Qırım mektepleri 10-uncı sınıflar içün «Qırım tarihı» dersliginden yapılğan papye-maşe alacaq», – dep izaatladı mektüpni adliyeci Lenura Yengulatova.
2019 senesiniñ başında Rusiye işğal etken Qırımda Qırım tarihı dersligi qavğa çıqarğan edi. Qırımnıñ sanat ve tasil saasınıñ hadimleri, adliyeciler Kreml kontrolindeki Qırım tasil nazirine muracaat etip, 10-uncı sınıflar içün S. V. Yurçenko muarririyetinde çıqqan «Qırım tarihı» Rusiye dersligini qullanuvdan çıqarmasını rica etti. Derslikte Ekinci cian cenki vaqtında «tatar ealisiniñ ekseriyeti almanlarğa yahşı yanaşqan, çoqusı faal sürette yardım etken edi» dep yazılğan.
Bunıñ kibi muracaatnı Qırım akimiyetine Kreml kontrolindeki Qırımtatar şurası da yolladı. Şura derslikte qırımtatarlarnıñ Ekinci cian cenkinde iştiraki ve 1944 senesiniñ sürgünligi aqqında berilgen malümatqa açuvlandı.
Bundan soñ mektep kütüphanelerinden derslikler qaytarılıp alındı. Martnıñ 25-nde Qırım tasil nazirliginiñ adliyeci Lenura Yengulatovanıñ muracaatına bergen cevabında 10-uncı sınıf talebeleri içün «Qırım tarihı» dersligi yarımada mekteplerinde qullanılmay, dep haber etilgen edi.
