Qırımnıñ Rusiye parlamentiniñ spiker muavini Yefim Fiks, parlamegt iş gruppası FSBge ve Rusiye Tahqiqat komitetine muracaatta bulunıp, 12 Ukraina vatandaşına qarşı Qırım «qamaçavı», hususan «suv qamaçavı» sebebinden cinaiy dava açmalarını rica etti, dep bildirdi. Bu aqta o, cumaaqşamı künü iş gruppasınıñ toplaşuvında ayttı, dep haber ete TASS.
«Protsessual teşkerüv keçirip, vatandaşlar Sençenko Andrey Vladilenoviç, Cemilev Mustafa, Çubarov Refat Abdurahmanoviç, Babin Boris Vladimiroviç, Poroşenko Petr Alekseyeviç, İslâmov Lenur Edemoviç, Staşuk Vasiliy Andreyeviç, Lutsenko İgor Viktoroviç, Porosük Vladimir Zinovyeviç, Putilov Andrey Stanislavoviç, Vorobyev Aleksandr Stepanoviç, Kravçuk Leonid Makaroviçke qarşı cinaiy dava açmağa rica etemiz», – dep bildire Fiksniñ aytqanlarını agentlik.
Daa evel berilgen malümatqa köre, Qırım akimiyeti Şimaliy-Qırım kanalı qapatılğan soñ «yarımadağa suv qamaçavı neticesinde ketirilgen zarar sebebinden» Ukrainağa qarşı dava açtırmağa azırlana. Qırımnıñ Rusiye parlamentiniñ reisi Vladimir Konstantinov halqara qurulışlarğa muracaat etmezden evel Rusiye mahkemelerine dava berilecek, dep bildirdi.
Qırımtatar Milliy Meclisiniñ reisi Refat Çubarov bu malümatnı izaatladı:
«Aydutlar cezasız çoq qalmamalı… Yoqsa başını coyalar. Ev, topraq, mülkimizni küçnen zapt etip tutqan, qırımtatar halqını ve etnik ukrainlerni taqip etken Rusiye işğalcileri ve olarnıñ hızmetçileri şimdi bizden «para, suv ve elektrik energiyasını» istey».
Daa soñra Kreml kontrolindeki Qırım parlamentiniñ reis muavini Yefim Fiks yarımadanıñ «suv qamaçavınen» bağlı davalar üç Ukraina vatandaşına qarşı olacaq, dep ayttı. Qırımnıñ Rusiye akimiyetiniñ fikirince, bu insanlar Şimaliy-Qırım kanalını qapatmağa qarar alğan edi – Andrey Sençenko, o vaqıt Ukraina prezidenti memuriyetiniñ yolbaşçı muavini vazifelerini eda etken edi, Qırımtatar Milliy Meclisiniñ reisi Refat Çubarov ve qırımtatar halqınıñ lideri Mustafa Cemilev.
Andrey Sençenko Qırım akimiyetiniñ bu beyanatını «can çekişüvi» dep adlandırdı. Ukraina reintegratsiya nazirligi Qırım akimiyetiniñ suv içün mahkemeleşmek istegini «külünçli» dep adlandırdı.
Ukraina Tış işler naziri Dmıtro Kuleba Azatlıq Radiosına intervyü berip, Dnipro suvı Qırımğa ancaq yarımada işğali bitken soñ berilecek, dep aytqan edi.
Ukrainanıñ BM monitoring missiyası Qırım yarımadasınıñ işğali sebebinden «Rusiye Qırımda insanlarnıñ suv teminatından mesüliyetli ola», dep israr ete.
Qırımnıñ suv teminlevi
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
