Qırımda suv teminlevi içün yañı quyularnı oktâbrniñ 12-nde qazıp başlaycaqlar. Bu aqta Qırımnıñ Rusiye yolbaşçısı Sergey Aksenov suv teminlevi vaziyetine bağışlanğan toplaşuvda ayttı.
«Bazarertesi künü (oktâbrniñ 12-nde – QA) federal qurulışlar da işke başlay. Qısqa müddet içinde bu quyularnı qazıp donatmağa planlaştıramız, bu quyulardan suv qoralarını quruv işlerini de aynı vaqıtta yapmağa isteymiz. İşke başlaymız», – dedi Aksenov.
Onıñ bildirgenine köre, 2021 senesi mart ayına qadar Aqmescit ve Aqmescit rayonında suv «vaziyetini yımşatmağa» ve suv berüv vaqtını arttırmağa planlaştırıla.
«Qoşma suv aluv işleriniñ planları aqqında ayrıca añlaşıp, qırımlılarğa haber etermiz», – dep qayd etti Aksenov.
Aqmescit suv anbarlarınıñ 10-12%-ı tolu, cedvelge riayet etilse, suv 2-3 ayğa yeter, dep bildirdi Qırımnıñ Rusiye ükümetiniñ yolbaşçısı Yuriy Gotsanük.
Rusiye iqtisadiyat inkişafı nazirligi diger Rusiye organlarınen beraber «Qırım ve Aqyarnı suvnen temin etüv planınıñ leyhasını» azırladılar.
Sentâbrniñ 7-nden itibaren Aqmescitte, Bağçasaray ve Aqmescit rayonlarında qurğaqlıq ve suv anbarlarında suv azlaşqanı sebebinden suv berüv sıñırlarınıñ üçünci, eñ sert etapı başlatıldı.
Qırımnıñ Rusiye ükümeti bildirgenine köre, yarımadanıñ suv teminatı ile «eñ yaramay stsenariyge» azırlanalar. Kreml kontrolindeki Qırım yolbaşçısı Sergey Aksenovnıñ bildirgenine köre, Rusiye Qırımnıñ suv teminatı vaziyeti fevqulâde olğanını tanıy. O, 2020 senesi 150 yıl içinde eñ quru oldı, dep bildirdi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
