Kreml kontrolindeki Qırım parlamenti çarşenbe künü, dekabrniñ 25-nde, Qırımnıñ Rusiye ükümeti ve Suriye iqtisadiyat ve tış ticaret nazirligi arasında «ticaret-iqtisadiyat işbirligi» añlaşmasını tasdıqladı. Bu aqta Qırım parlamentiniñ matbuat hızmeti bildire.
«Añlaşmağa köre, Qırım-Suriye ticaret evi, gemiler şirketini qurmağa, sergi, yarmalıq ve diger tedbirlerde iştirak etmege planlaştırıla», – dep bildire matbuat hızmeti Qırımnıñ Rusiye parlamentiniñ spikeri Vladimir Konstantinovnıñ aytqanlarını.
Vesiqa birden eki oquvda qabul etildi. Konstantinovnıñ aytqanına köre, añlaşma «işğal etilgen Qırımnıñ Suriye ile tış iqtisadiyat bağlarını kenişletmek ihtiyacı sebebinden» qabul etildi.
ABD Senatınıñ tış işler komiteti dekabrniñ 12-nde Rusiyege qarşı Suriyedeki faaliyeti sebebinden sanktsiyalarnı quvetleştirgen qanun leyhalarını qabul etti. Vesiqağa köre, Rusiye şirketleriniñ ya da vatandaşlarınıñ «Suriyege silâ taşığanı, Suriye ükümetine maliye, maddiy ya da tehnologik yardım köstergeni, silâ almaq küçüni arttırğanı» isbatlansa, olar sanktsion cedveline kirsetilecek.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
