Moskva kontrolindeki Qırım parlamentiniñ deputatları Rusiyeniñ turistik faaliyetine dair qanunına kirsetilecek deñişmelerge qarşı çıqtı. Olar Rusiye Devlet dumasınıñ reisi Vâçeslav Volodinge muracaat etti.
Laf şahsiy evlerge turistlerni almaq yasağı aqqında kete.
«Rusiyeniñ kurort regionlarındaki bir çoq belediyelerde şahsiy ev saipleri öz evlerine turistlerni ala. Sıq-sıq sanayı ve köy hocalığı müessiseleri olmağan, hızmet saası inkişaf etmegen köylerde şahsiy evlerde turistlerni yerleştirmek yerli sakinlerniñ yekâne kâr menbası ola», – dep tüşüne Turizm, kurort ve sport komitetiniñ reisi Aleksey Çernâk.
Onıñ bildirgenine köre, bunıñ kibi sıñırlavlar Qırımnıñ turistik saasına menfiy tesir etecek.
Çernâknıñ fikirince, qanun deñişmeleri qabul etilse, turistlerni yerleştirüv hızmetleriniñ bazarı «kölgede qalacaq» ve köy hocalığınıñ meşğulligi eksilecek.
2019 senesi oktâbrniñ 1-nde Rusiyede ve işğali altındaki Qırımda mesken evlerde hostel yapmağa ve dairelerni musafirhane olaraq qullanmağa yasaq etken qanun leyhası işke tüşürildi.
Qırımnıñ küçük musafirhane Birliginiñ turistik biznesiniñ vekilleri Rusiye Devlet dumasınıñ deputatlarına mektüp yazıp, «bizneslerini yoq etmemege» rica etti.
