Rusiye Devlet Dumasınıñ qırımlı deputatı Ruslan Balbek ve Qırımnıñ milletlerara munasebetler devlet komitetiniñ reisi Lenur Abduramanov Qırım ilhaqından soñ Rusiye vesiqaları olmağanından elektriksiz qaldırılğan camilerde «elektriknen bağlı problemniñ tez vaqıtta çezilmesine» yardım etmege vade eteler.
Rusiye kontrolindeki Qırım müftiliginiñ bildirgenine köre, Toqluq (Bogatovka, Sudaq regionı), Bağçasaray rayonınıñ Küçük Yaşlav (Viktorovka), Aqmescit rayonınıñ Yaşlıq (Molodejnoye) ve Tavel (Krasnolesye) köyleriniñ din cemiyetleri vekilleriniñ Qırım musulmanları diniy idaresiniñ reberlerinen «camilerdeki vaziyetnen bağlı» körüşüvleri oldı.
Müftilikniñ matbuat hızmeti qayd etkenine köre, 2014 senesi Qırım musulmanları diniy idaresi çeşit qurulışlarğa muracaat etip, Qırımdaki bu binalarnıñ elektrik, suv ve gaz teminlevini «vesiqaları qanunğa (Rusiye – QA) köre azırlanğanına» qadar toqtatmamağa rica etken edi.
«Lâkin bugünki künde alâ daa vesiqalarını resmiyleştirmegen, energiya bergen şirketlernen añlaşma tizmegen camiler bar, bazılarınıñ din cemiyetleri qayd olmağan ve borcları bar. Bular camilerde elektrik kesilüviniñ sebepleri oldı», – dep aytıla haberde.
Qırım musulmanları diniy idaresi bildirgenine köre, yerli rayon elektrik stantsiyalarına kefalet mektüpleri yollandı, elektriksiz qalğan camilerge Ramazan ayı devamında Rusiye qanunlarına köre vesiqalarnı resmiyleştirmek şartınen elektrik bermege rica etti.
«Problemli camilerde topraq ve diniy binalarnıñ vesiqaları endi resmiyleştirile ve yerli din cemiyetleriniñ quruluvı ve resmiyleştirilüvi esnası başlatıldı», – dep aytıla QMDİ matbuat hızmetiniñ haberinde.
2014 senesi Rusiye Qırımnı işğal etken soñ Qırım musulmanları diniy idaresi yapqan areketlerini Qırımtatar Milliy Meclisi ile muzakere etmeyip, Rusiye qanunlarına köre Qırım ve Aqyar musulmanları diniy idaresi olaraq yañıdan qayd etilgen edi.
2018 senesi oktâbr ayında Qırım musulmanları Rusiye qurultayınıñ delegatları Aqmescitte Emirali Ablayevni Qırım musulmanlarınıñ müftisi olaraq daa 5 yılğa sayladılar.
