Kreml nezareti alrındaki Qırım akimiyeti, kurort ücreti alınması eksperimentinden vazgeçmege qarar berdi.
Qırım kurort ve turizm naziri Vadim Volçenko TASS-qa haber etkeni kibi, kurort ücretinden vazgeçüv, Keriç köprü maşnalarğa açılğanından ilerilep başlağan, turistik biznesine qoltutmağa imkân bere.
“Şimdi bir qaç federal müessisesi, Qırım bu eksperimentte işrirak etmesin dep qanun leyhasını azırlay”, - yaza Volçenkonıñ sözlerinde TASS.
Nazir, Qırım eksperimentte işriraginı kesen-kes inkâr etecegi aqqında bildirdi.
Volçenkonıñ aytqanına köre, ücretten vazgeçüvniñ sebebi - “turistik biznesniñ tarafından olğan kütleviy muracaatlar”.
“Qırım köprü açılğanından soñ, evel turistler ziyaret etmegen Qırım bölgeleri tolıp başladı. 2018 senesi iyül-avgustta Qırım 100% tolu edi. Bu, ilerlevniñ başı olğanını añlaymız ve bu arada kurort ücreti kibi şeyler inkişafqa zarar ketire bile. Bunı añlap, otel saipleri ücretniñ lâğu etilmesi, ya da keççe başlaması muracaatınen hitap etti”, - dedi nazir.
