Yarımadada «qırımtatar halqına nisbeten nefret doğurğan» ibareler bulunğan 10-uncı sınıf talebeleri içün Qırım tarihı dersligini muzakere etmege devam etecekler.
Bu aqta «İnterfaks» Rusiye haber agentligi Qırımnıñ Rusiye tasil naziri Natalya Gonçarovanıñ malümatına esaslanıp yaza.
«İşçi gruppa qurulacaq, malümat daa bir kere baqıp çıqılacaq, ve qarar alınacaq. Qırımtatar halqı vekilleriniñ suallerini doğurğan paragraflar boyunca ders keçirüv usuliy tevsiyeler azırlanacaq ya da bu bar tolusınen deñiştirilecek», – dep yaza Gonçarovanıñ aytqanlarını kütleviy haber vastası.
Bazarertesi künü, fevralniñ 18-nde, Qırım kütleviy haber vastaları Rusiye Devlet dumasınıñ deputatı Ruslan Balbekniñ malümatına esaslanıp bildirdi ki, Qırımnıñ mektep ve açıq kütüphanelerinden onuncı sınıf talebeleri içün yarımada tarihı dersligi alınacaq.
Qırımtatar Milliy Meclisiniñ reisi Refat Çubarov, Qırımnıñ mektep kütüphanelerinden 10-uncı sınıflar içün «Qırım tarihı» Rusiye dersligini almağa başladılar, dep bildirdi.
Qırım aq qorçalayıcı gruppası 10-uncı sınıflar içün «Qırım tarihı» Rusiye dersliginde «qırımtatar halqına nisbeten nefret doğurğan ibareler buluna», dep bildirdi.
«Almenda» vatandaş maarifi merkeziniñ reberi Valentina Potapovanıñ fikirince, derslikteki ibareler milletlerara zıddiyetlerge yol aça bile.
Daa evel Qırımnıñ sanat ve tasil saalarınıñ hadimleri, adliyeciler Kreml kontrolindeki Qırım tasil naziri Natalya Gonçarovağa muracaat etip, 10-uncı sınıflar içün S.V.Yürçenko muarrirligi altında çıqqan «Qırım tarihı» Rusiye dersligini almağa rica etti. İşbu derslikte Ekinci cian cenki vaqtında «tatar ealisiniñ ekseriyeti almanlarğa yahşı baqa, bir çoqu ise faal sürette yardım etken edi», dep qayd etile.
Bundan ğayrı, Kreml kontrolindeki Qırımtatarlar şurası Qırım akimiyetine muracaat yollap, 10-uncı sınıflar içün yarımada tarihı dersliklerini kütüphanelerden almağa rica etti. Şura, derslikte qırımtatarlarnıñ Ekinci cian cenkinde iştiraki ve 1944 senesiniñ sürgünligi nasıl añlatılğanını begenmey.
