Qırımnıñ Rusiye akimiyeti yarımadada ormanlarnı ziyaretlerge qapatıp, yanğın telükesi müddetini mayısnıñ soñuna qadar uzattı. Bu aqta Kreml kontrolindeki Qırım ükümetiniñ yolbaşçısı Yuriy Gotsanük bildirdi.
«Bugünden başlap Ekologiya nazirliginiñ buyruğınen yanğın telükesi müddeti bu aynıñ soñuna qadar uzatıla», – dep qayd etti o.
Qırımnıñ Rusiye yolbaşçısı Sergey Aksenovnıñ aytqanına köre, bu buyruq koronavirus qırğınlığı sebebinden qabul etilmedi.
«Bu quru bir mevsim. Koronavirus sebebinden degil, yanğın telükesi yüksek olğanı içün ormanlarnı qapatmağa qarar berdik», – dep qoştı Aksenov.
Yüksek yanğın telükesi ve koronavirusnen bağlı sıñırlav tedbirleri sebebinden ormancılar qurtarıcı, Rusiye politsiyasınıñ hadimleri ve qazaq qafilelerinen beraber Yalta dağ orman qoruğınıñ qoruvını quvetleştirdi.
Qırımda yaznıñ yanğın telükesi mevsiminiñ başlanğıçını aprelniñ 1-nden belgiledi.
