Qırımnıñ Rusiye akimiyeti Qırımtatar Milliy Meclisine ait mülkni Rusiye kontrolindeki Qırım musulmanları diniy idaresine (QMDİ) bermege istey. Bu aqta Qırımnıñ Rusiye ükümeti yolbaşçısı Sergey Aksenov bazarertesi künü, oktâbrniñ 29-nda, bildirdi.
Böyle bir teşebbüs cumaertesi künü, oktâbrniñ 27-nde, Rusiye nezaretindeki Qırım musulmanları diniy idaresi toplağan Qurultayda bildirildi.
Qırımdaki Qırımtatar Milliy Meclisine ait obyektler aydınlatılmadı.
Aksenovnıñ qayd etkenine köre, al-azırda Qırımda «devletleştirüv» yoq, amma Qırımtatar Milliy Meclisiniñ mal-mülkine nisbeten «böyle tedbirler alınmalı».
«Tafsilâtlarını bilmeyim. Belli obyektlerni bilmeyim, kün soñuna qadar baqıp, fikirimni aytarım», - dedi Aksenov.
Qırım.Aqiqat Sergey Aksenovnıñ aytqanlarından soñ Qırımtatar Milliy Meclisiniñ reberliginden izaat almağa tırışa.
2014 senesi Rusiye kontrolindeki Qırımnıñ Arbitraj mahkemesi Meclis binasını Rusiye devletine bermege qarar alğan edi, binalarda tintüvler keçirildi.
Qırımtatar Milliy Meclisi, Aqmescitniñ rus Merkeziy rayon mahkemesiniñ qararına riayet etip, binanı terk etmege mecbur edi. Anda «Qırım» hayriye fondu ve «Avdet» gazetasınıñ muarririyeti de yerleşe ediler.
Kreml kontrolindeki Qırımnıñ Yuqarı mahkemesiniñ qararınen Qırımtatar Milliy Meclisi Rusiye ve işğal etilgen Qırımda 2016 senesi aprelniñ 26-nda yasaq etilgen edi. Meclis imayesi Rusiye Yuqarı mahkemesine itiraz arizasını berdi, amma 2016 senesi sentâbrniñ 29-nda onı red ettiler.
2017 senesi aprelniñ 19-nda Halqara mahkeme Ukrainanıñ Rusiyege qarşı davası boyunca qısmen qarar çıqardı. Gaaga mahkemesi qırımtatarlarnıñ ve ukrainlerniñ aqlarını sıñırlamamağa, Meclis yasağını lâğu etmege ve işğal etilgen Qırımda ukrain tilinde tasil alma imkânlarını temin etmege talap etken edi. Rusiye, işbu talaplarnı bugünge qadar yerine ketirmedi.
