Qırımnıñ Rusiye akimiyeti Kezlevdeki Ukraina Pravoslav kilsesiniñ ibadethanesini yıqmağa talap ete. Bu aqta Ukraina Pravoslav kilsesiniñ Çerniğiv ve Nijın arhiyepiskopı Yevstratiy (Zorâ) haber etti.
«Yaqında Kezlevde ibadethanege buyruqlar berilip başladı, o, qanunsız qurulğan ve yıqılmaq kerek eken», – dep tekrarlay arhiyepiskopnıñ aytqanlarını UNN ukrain haber agentligi.
Ukraina Pravoslav kilsesiniñ resmiy saytında Kezlevdeki ibadethaneniñ vaziyetinen bağlı malümat şimdilik yoq.
Qırım.Aqiqat tafsilâtlı malümat almağa tırışa.
Ukraina prezidenti Petro Poroşenko fevralniñ 20-nde New Yorkta BM Baş Assambleyasınıñ toplaşuvında Qırımnıñ Rusiye akimiyeti Ukraina Pravoslav kilsesi Qırım yeparhiyasınıñ cemaatından Aqmescitteki Kafedral kilseniñ binasını terk etmesini talap etti, dep bildirdi. Poroşenkonıñ qayd etkenine köre, işğal altındaki yarımadada din kütüv serbestligi telüke altında buluna.
Ukraina Pravoslav kilsesi Qırım yeparhiyasınıñ arhiyepiskopı Kliment Qırım akimiyeti ibadetler keçirilgen Aqmescitteki Kafedral kilseniñ binasını martnıñ soñuna qadar boşatmağa talap ete, dep bildirgen edi.
Fevralniñ 13-nde Qırımnıñ Rusiye mal-mülk nazirligi Kyiv patriarhatı Ukraina pravoslav kilsesiniñ Qırım yeparhiyasına yollanğan talap yañı qurulğan Ukraina Pravoslav kilsesine keçken Kyiv patriarhatı Ukraina pravoslav kilsesiniñ yeparhiyası ile tizilgen añlaşmanıñ bitmesinen bağlı, dep bildirdi.
