Qırımda keçken ay «izinsiz qurulğan» 14 obyekt qayd etildi, dep haber ete Rusiye kontrolindeki Qırım Gosstroynadzor müessisesi.
Bu malümatqa köre, «ruhsetsiz qurulğan obyektler» Aluştada (4), Kefede (3), Yaltada (5), Aqmescit rayonında (1) ve Aqmescitte «qomşu topraq damartısınıñ sıñırlarından boşluq qaldırmayıp, qurulğan eki qatlı bina qayd etildi».
Haberde aytılğanına köre, Gosstroynadzor «qanunsız qurulğan binalarnıñ yıquvı» aqqında dava arizalarınıñ mahkemege berilmesi içün yerli idare organlarına malümat berdi.
Devlet qurucılıq nezareti hızmetiniñ yolbaşçısı Yuriy Prihojanovnıñ bildirgenine köre, onıñ müessisesi 2020 senesi mayısnıñ 1-nde derc etilecek yarımadadaki «izinsiz qurulğan» bütün inşaatlarnıñ siciligi şekillendire.
Yanvar ayında şeerniñ Rusiye akimiyeti izinsiz qurulğan 600 inşaat yıqılacaq, dep bildirgen edi.
İşğal etilgen Qırımda ve Aqyarda yerli akimiyet qanunsız dep ilân etilgen ticaret inşaatlarınen küreşe, tükân, qave, bazardaki ticaret noqtaları ve pansionatlar yıqılacaq.
