Rusiye kontrolindeki Qırım yolbaşçısı Sergey Aksenovnıñ fikirince, yarımadada izinsiz qurulğan inşalarnıñ sayısı «qarardan çoq» oldı. Şu sebepten Qırımnıñ Rusiye akimiyeti izinsiz qurulğan binalar içün cinaiy mesüliyetke çekmek içün belli qanunnıñ qabul etilüvini teklif ete.
Bu aqta Qırımnıñ Rusiye ükümetiniñ saytında haber etile.
«İzin vesiqaları olmağan ve qurucılıq işlerini kerçekleştirgen şirketlerniñ saipleri ve müdirlerini cinaiy mesüliyetke çekmek içün federal akimiyet organlarına teklif azırlaymız. Bücet parasında bir kapik masraf etilgen olsa, cinaiy mesüliyet ve tazminat ödenmesi olacaq. Qurmağa başlağan ivaz etmeli ve cinaiy mesüliyetke çekilmeli», – dep ayttı Aksenov Rusiye Devlet dumasınıñ Qırım deputatlarınen körüşip.
Sergey Aksenov, politsiya ve prokuratura yarımadada «izinsiz qurulğan inşalarnı yoq etüv işlerinde vekâletli şahıslarnıñ ve kontrol organlarınıñ areketsizili içün» memuriy davalar açacaq, dep bildirgen edi.
2020 senesi yanvar ayında Qırımnıñ Rusiye parlamenti mal-mülk ve topraq munasebetleri komitetiniñ yolbaşçısı Yevgeniya Dobrınâ, qurucılığı bitmegen obyektleri olğan işğal etilgen Qırım sakinleri olarsız qalmaları mümkün, dep bildirdi.
2019 senesi avgust ayında bildirilgenine köre, 2020 senesi Qırım akimiyeti «izinsiz qurulğan inşaatlarnı yıqacaq» yekâne müessiseni qurmağa niyetlene, buña tahminen 80 mln ruble ayırılacaq.
