Rusiye kontrolindeki Qırım akimiyeti Bağçasaray tarihiy-medeniy ve arheologik müzey qoruğı Han sarayınıñ eksponatları içün «büyük» anbar yapacaq ola.
Bu meseleni Qırımnıñ Rusiye yolbaşçısı Sergey Aksenov Milletler meseleleri Federal agentliginiñ reberi İgor Barinov ile muzakere etti.
«Bağçasaray tarihiy-medeniy ve arheologik müzey qoruğınıñ Han sarayını tiklev işleriniñ ketişatını ve müzey içün büyük anbar olacaq ayrı yer berilmesi zarur olğanını muzakere ettik. Al-azırda tamir işleri soñki basamaqta ve 2022 senesi bitecek», – dep aytıla Qırım Nazirler şurasınıñ saytındaki haberde.
Aksenovnıñ fikirince, sergi ekspozitsiyaları kenişletilmeli ve daa evel anbarda olğan eksponatlar cemaatqa taqdim etilmeli.
Kyiv, Rusiye akimiyetiniñ Hanlar sarayında keçirgen «restavratsiyanı» çoq tenqit etken edi. Ukraina medeniyet nazirligi bu işler sebebinden Hanlar sarayınıñ baş korpusı yoq etile bile, dep bildire.
Qırımtatar faali Edem Dudakov Bağçasaraydaki Hanlar sarayınıñ «restavratsiya» neticelerini «butaforiya» dep adlandırdı. O, Büyük Han cami «rekonstruktsiyasınıñ» birinci basamağı yekünlengenine dair malümatnı böyle izaatlağan edi.
Bağçasaraydaki Hanlar sarayı – qırımtatarlarnıñ tarihınen bağlı eñ meşur müzey, Qırım hanları Geraylarnıñ yaz rezidentsiyasıdır. Müzey kompleksinde saray, garem, hanlar mezarlığı ve cami bar. O, UNESCO dünya mirasınıñ cedveline kirsetilecek namzetler sırasında mevcut.
