Rusiye işğal etken Qırımda keçken afta «doğğan ekizlerniñ rekord sayısı» qayd etildi, dep bildire Qırım Adliye nazirliginiñ matbuat hızmeti.
«8 ekiz qayd etildi: 2-şer – Aqmescit ve Sudaqta, birer – Saq şeerinde, Aqşeyh, Curçı ve Krasnoperekopsk rayonlarında. Bu sayı rekord ola, çünki Qırımda bir afta içinde eñ çoq 4 ekiz dünyağa kelgen edi», – dep aytıla haberde.
Adliye nazirliginiñ malümatına köre, «yañı doğğanlarnıñ umumiy sayısı da yüksek» – eki afta içinde olarnıñ sayısı 500-ge yaqınlaştı.
Eñ çoq Aqmescit ve Aqmescit rayonında – 126, Kezlevde – 23, Keriç ve Bağçasarayda – 19-ar, Saq, Qarasuvbazar rayonı ve Yaltada – 18-er, Canköyde – 16 bala doğdı.
Qırımlılar balalarına siyrek rastkelgen adlarnı qoya: Anfisa, Alevtina, Emilâ, Asel, Yan, Gülsum, Filipp, Miloslava, Arianna, Vesta, Asene, Emran, Vilena, Karolina, Hariton, Şandro ve Agnessa.
Bundan ğayrı, bir afta içinde 139 çift evlendi. Aqmescit ve Aqmescit rayonında 57, Yaltada 17 ve Keriçte 12 qoranta quruldı. Kelinler 29-32 yaşlarında, kiyevler 32-36 yaşlarında edi, – dep bildirdi Qırımdaki Rusiye adliye nazirligi.
