Qırımnıñ Rusiye akimiyeti koronavirus yuqunçınıñ tarqaluv telükesi sebebinden kirsetilgen sıñırlavlarğa baqmadan, çalışa bilecek müessise cedvelini kenişletti. Bu aqta Kreml kontrolindeki Qırım yolbaşçısı Sergey Aksenovnıñ buyruğında aytıla.
«Çoq qatlı evlerni qurğan, hususan tış hızmetçi ve (ya da) sub tış hızmetçisiniñ añlaşmaları esasında çalışqan teşkilâtlar, internet-tükânlarınıñ sımarış berüv noqtaları, tükânlarğa ve diger ticaret infrastruktura obyektlerine hızmet köstergen teşkilâtlarnıñ faaliyetine iş vaqtı rejiminde çalışmağa izin berile», – dep aytıla vesiqada.
Buyruqqa köre, notarius, kiçik ve orta iş subyektlerine qol tutuv infrastrukturasını tertiplegen teşkilâtlar, ealiniñ meşğullik merkezi sıñırlavlarğa oğramaycaq.
Daa evel Qırımda koronavirus yuqunçınıñ tarqaluv telükesi sebebinden vatandaşlarnıñ özüni tecrit etüv rejimi aprelniñ 30-na qadar uzatıldı.
Aprelniñ 5-nde saba işğal edilgen Qırımda 2974 insan tibbiy közetüv altında, 2886-sı dinamik közetüvde qala. 66 insan hastahanede, 22 insan observatorda buluna. Qırımda 20 koronavirus yuqunçı hastası qayd etildi, 6 tüzelgen hasta hastahaneden çıkarıldı. Aqyarda 5 kişi koronavirusqa oğradı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
