Kreml kontrolindeki Qırım akimiyeti Aqmescit ava limanında terrorizm ile küreşni temin etecek tış hızmetçisini saylamaq içün tenderni ilân etti. İşlerniñ fiyatı 931 mln ruble olacaq, dep bildire RosTender.info.
Vesiqalarğa köre, ava limanında patrul yolu, dört kontrol-keçiş noqtası, signalizatsiya ve kameraları olacaq qoralar qoyulmalı. Ava limanında video nezareti sisteması da qoyulmalı.
Berilgen malümatqa köre, maliye parasınıñ ava limanınıñ bücet yatırımlarından alğan sermiyadan alınması beklenile.
2018 senesi dekabr ayında Qırımnıñ Rusiye yolbaşçısı Sergey Aksenov yarımadada terror telükesi arta, dep bildirgen edi. Onıñ aytqanına köre, esas telüke «Ukraina reberliginiñ regiondaki vaziyetni kerginleştirmek ıntıluvlarınen bağlı».
Fevral ayında Aksenov maliye etilmeycek «terror ile küreş tedbirlerini» bir ay içinde bitirmege talap etken edi.
2018 senesi aprelniñ 16-nda Aqmescitte Rusiye akimiyeti ava limanınıñ yañı terminalını açtı. Onı 22 ay içinde aman-aman 32 mlrd ruble (13 mlrd ğrıvnâ – QA) sarf etip qurğanlar.
Ukraina Qırım üzerindeki ava boşluğından mesüliyetli olğan devlet olaraq Rusiyeniñ Qırım işğalinden soñ onıñ uçaq areketlerini ve ava limanlarını qapattı. Anda ve andan kerçekleştirilgen uçaq seferleri Ukraina ve halqara qaidelerini boza. Daa soñra Qara deñiz üzerindeki bazı yollar vatandaş aviatsiyası içün kene açılğan edi. Rusiye ava şirketleri yasaqqa baqmadan, halqara uquqnı bozıp, ilhaq etilgen Qırımğa uçmağa devam ete.
