Rusiye nezaretindeki Qırım melioratsiya ve suv hocalığı devlet komitetiniñ başı İgor Vayl, Aqmescitni ğıdalağan suv anbarlarında ne qadar suv qalğanını bildirdi.
Onıñ malümatına köre, Ayan suv anbarınıñ 44% acimi bar - bu 1 million 710 kub metr suv, Aqmescit suv anbarınıñ - 18%, yani 4 million 390 kub metr suv, Sabla (Partizanskoye) suv anbarınıñ - 18,5% - bu 6 million 318 kub metr suv.
Bu malümatnı o Qırım suv teminatı aqqında muşaverede seslendirdi.
Bundan ğayrı Vayl, Aqmescit künde 108-110 biñ kub metr suv qullanğanını qayd etti.
Daa evel Qırım sakinlerine şahsiy gigiyena içün künde 4 litrge qadar suv qullanmağa tevsiye etildi.
İyül ayında Qırımda suv anbarlarından Aqmescit ihtiyacalarına suv berecek suv borusını qurğan Rusiye arbiyleri keldi.
İyülniñ 13-nde Rusiye Mudafaa nazirligi bildirdi ki, Rusiye ordusınıñ bölükleri Taygan ve Aqmescit suv anbarlarını birleştirecek borunıñ 50-den çoq kilometrini qoydı.
İyünniñ 11-nde Qırımnıñ Rusiye yolbaşçısı Sergey Aksenov, Taygan suv anbarını Aqmescitni suvnen temin etüv sistemasınen vaqtınca birleştirecek suv boruları Rusiyeden Qırımğa keldi, dep bildirdi.
İyülniñ 8-nde berilgen malümatqa köre, Aqmescit içün suv yaqın suv anbarlarınıñ yedeklerinden 110 künge qaldı.
«Fobos» Rusiye ava merkeziniñ mütehassısı Yevgeniy Tişkovets, 2019 senesi küzde başlağan qurğaqlıqtan soñ yaz yağmurları Qırımda suv qıtlığı problemini tolusınen al etip olamaz, dep qayd etti.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
