Kreml kontrolindeki Qırım akimiyeti Avropa memleketlerinden siyasetçi, jurnalist ve cemaat erbapları eyyetiniñ avgust ziyareti aqqında ilân etti.
«Avgust ayında musafirlerimiz olacaq, jurnalistlerniñ iştiraki ile eki büyük gruppa, olarnen endi çalışqan edik… Siyasetçi, jurnalist, sportçı, cemaat erbapları», – dep tarif etti Qırım parlamentiniñ milletlerara munasebetler komitetiniñ reisi Yuriy Gempel RİA KRIM neşirine.
Parlament vekili eyyetlerniñ erkânında kütleviy haber vastalarınıñ temsilcileri olacaq, dep qayd etti.
Bundan ğayrı, parlament komitetiniñ reisi al-azırda Qırımda alman biznesi bar, dedi.
«Bugün mında küçük, orta alman biznesi bar… Muvafaqiyetli çalışa, dep aytmağa isteyim», – dep qoştı o.
Gempel, oktâbr ayında alman-norveg eyyetiniñ yarımada ziyareti planlaştırıla, dep tasdıqladı. Eyyet erkânında Almaniyanıñ ükümran firqalarınıñ vekilleri olacaq.
Ukraina Devlet sıñır hızmetiniñ malümatına köre, 2018 senesiniñ başından 740 yabancınıñ ilhaq etilgen Qırım ve Donetsk ve Lugansk vilâyetleriniñ işğal etilgen topraqlarını ziyaret etkeni içün Ukrainağa kirişi üç yılğa yasaqlandı.
Çetel vatandaşlarını Qırımğa davet etip, yarımadanıñ Rusiye akimiyeti onıñ ilhaqını qanunlaştırmağa tırışa.
Ukraina Tış işler nazirliginiñ qayd etkenine köre, çetel siyasetçileriniñ Qırım ziyaretleri resmiy degil. Ukraina nazirligi 2016 senesi iyül ayında muracaat derc etip, çetel vatandaşlarını ve vatandaşlıqsız şahıslarnı Qırımğa qanunsız ziyaretlerden vazgeçmege çağırdı.
