İşğal etilgen Qırımğa trennen kirgen rusiyelilerniñ sayısı bir afta içinde eki qat arttı.
Bu aqta Qırım ve Aqyardaki Rospotrebnadzor idaresiniñ yolbaşçısı Natalya Penkovskaya mayısnıñ 20-nde koronavirus tarqaluvı ile küreş operativ ştabınıñ toplaşuvında.
«Mayısnıñ 12-ne baqqanda trennen kelgen şahıslarnıñ sayısı eki qat arttı. (Esas Ukraina ile – QA) (memuriy – QA) sıñırnıñ maşina keçiş noqtalarından keçken şahıslarnıñ sayısı da arta: mayısnıñ 12-nden evel 8-16 insan kelgen olsa, mayısnıñ 14-nden soñ 27-38 insan kelip başladı. Soñki künde 15 kişi keldi», – dep tarif etti Penkovskaya.
Mayısnıñ 20-nde saba Qırımda qayd etilgen bir koronavirus hastası aqqında haber etildi. Bugünge qadar 299 koronavirus hastası qayd etildi. 25-i çetelden keldi, 31-i – Rusiyeden. 122 insan tüzeldi, 9 insan vefat etti. Umumen yılnıñ başından berli Aqyarda 143 kişi koronavirus yuqunçına oğradı, eki insan vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
