Ukraina reintegratsiya naziri Oleksiy Reznikov Kyiv akimiyeti Qırımğa yarımadanıñ etnik erkânını deñiştirmek içün ketirilgen yarım million rusiyelini ne yapacaq sualine cevap berip, «biriniñ gumanitar aqqı kesen-kes bozulmaycaq», dep ayttı.
«Er kesniñ qarar bermege imkânı olacaq. Ukrainada yaşamağa isteseler, çetel vatandaşı statusını ala bile, Ukraina vatandaşlığını qabul ete bile ya da vatandaşlıqsız şahıs olaraq yaşay bile. Ya da başqa qarar ala bileler – tarihiy vatanlarına qaytuv kibi. Stalin rejiminiñ mirasçıları kibi sürgün etmeycekmiz», – dedi nazir LB.ua intervyüsında.
Hatırlatamız, 2020 senesi sentâbr ayında BM toplaşuvlarından birinde BM Ukrainanıñ daimiy vekili Serğiy Kıslıtsâ Qırımdaki demografik deñişmelerni «büyük problem» dep adlandırdı. Emin ki, Rusiye Ukraina tarafdarı ealini yarımadadan çıqarmağa tırışa.
Rusiye kontrolindeki Qırım ve Aqyar statistika idaresiniñ reberi Olga Baldina 2014 senesinden berli işğal etilgen Qırım sakinleriniñ sayısı tahminen 20 biñge arttı, dep bildirgen edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
