Aprelniñ 9-ından soñ Qırımğa kelgen er kes eki aftağa özüni izolâtsiya etmege ya da öz isteginen observatorğa barmağa mecbur. Bunıñ aqqında Qırım başı Sergey Aksönovnıñ buyruğında bildirile.
"Qırım Cumhuriyetiniñ territoriyasına kelgen bütün vatandaşlar yaşağan yerlerinde 14 künge özüni tecrit etmeli. Yaşağan yerlerinde bunıyapmağa imkânları olmağanlar observatorda tibbiy nezaret astında olmalı", - denile buyruq metninde.
Daa evel Aqyarda koronavirusqa oğrağan beş kişi aqqında haber etilgen edi, dördü tüzeldi. Aqyarda koronavirusnen hastalanğanlardan biri ağır alda buluna, pnevmoniyası başlandı. Aprelniñ 9-nda saba 584 insan yaşağan yerinde közetüv altında qala.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 12-ne qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
