Keçken afta içinde Kremlniñ kontroli altında olğan Qırım Rosselhoznadzorı (Veterinariya ve fitoveterinariya nezareti boyunca federal hizmet) inspektorları, qıta Ukrainadan ilhaq etilgen Qırımğa 212 kilogramm erzaq ve doquz ayvannı yibermediler. Bunı muessiseniñ matbuat hizmeti bildire.
"Mahsulat, "Armânsk", "Canköy" ve "Perekop" kiriş-çıqış noqtalarında adamlarnıñ el ve maşna bagajlarında tapılğan edi", - denile beyanatta.
Muessisede, mahsulat ve ayvanlarnıñ Ukrainanıñ qıtadaki territoriyasına qaytarğanlarını ilâve ettiler.
Qomşu Rusiye ve ilhaq etilgen Qırımda, Qırım ilhaqı ve Ukrainanıñ şarqındaki tecavuzı içün daa evel Moskvağa qarşı sanktsiyalarnı qabul etken devletlerge qarşı erzaq ve köy iqtisadiyatı mahsulatınıñ ithalâtına sıñırlav tedbirleri tatbiq etildi.
