Qırğızistan prezidenti ve parlamenti çalışqan binanı oktâbrniñ 4-nde olğan parlament saylavlarınıñ neticelerine qarşı narazılıq bildirgenler zapt etti, dep haber ete Azatlıq Radiosı.
Oktâbrniñ 5-nde Bişkekte narazılıqlar ve narazılıq bildirgenler ve telükesizlik quvetleri arasında çatışmalar devam etti. Oktâbrniñ 6-na keçer gecesi Qırğızistan prezidenti ve parlamenti çalışqan binanıñ üçünci qatında yanğın çıqtı, dep bildire Azatlıq Radiosınıñ qırğız hızmeti. İçtimaiy ağlarda derc etilgen fotoresimlerde narazılıq bildirgenlerniñ odadan odağa keçip, mebelni bozğanları körüne. Odalardan birinde Sooronbay Jeenbekovnıñ süretini divardan alıp taşlağanlar, narazılıq bildirgenlerden biri onı çerçiveden çıqardı.
Qırğızistannıñ sabıq prezidenti Almazbek Atambayev narazılıq bildirgenlerniñ talabınen Milliy telükesizlik devlet komitetiniñ SİZOsından azat etildi.
Qırğızistan prezidentiniñ memuriyeti ve parlamenti olğan bina zapt etilgen soñ, narazılıq bildirgenlerniñ bir qısmı Milliy telükesizlik devlet komitetine taba ketti.
MTDKniñ qaravulını yapqan quvetçiler qollarını köterip çıqtı, halqnıñ yanında olğanlarını ayttı. Devlet komitetiniñ reberligi ile yapılğan muzakerelerden soñ, 2019 senesi avgust ayından berli MTDV SİZOsında tutulğan sabıq Qırğızistan prezidenti Almazbek Atambayev azat etildi. Bu yerli saatnen saba saat 4:30-larda edi. Atambayevniñ matbuat kâtibi Kunduz Joldubayeva azatlıqta olğanını tasdıqladı.
İyün ayında onı qabarcılıqta qabaatlap, 11 yıl ve eki ay apiste yatmasına üküm etkenler.
Soñra sabıq deputat Sadir Japarov ve iyün ayında 18 yıl apiste qalmasına üküm etilgen sabıq baş nazir Sapar İsakov azat etildi.
KTRK devlet telekanalı da narazılıq bildirgenlerniñ kontroli altına keçti. Yayında olar Bişkekte soğuncılıq yapmamağa rica ete.
Narazılıq bildirgenler oktâbrniñ 5-nde saba Bişkek soqaqlarına çıqıp, oktâbrniñ 4-nde olıp keçken parlament saylavlarınıñ neticelerini qabul etmegenini bildirdi. Aqşam üstü insanlarnı dağıtmaq içün parlament ve prezident memuriyetiniñ binasından onlarnen quvetçi köz yaşlatıcı gaz, rezina qurşunları, ışıq ses granataları ve suvatqıçlarnı qullandı. Narazılıq bildirgenler dağıldı, amma soñra kene parlament binasına keldi, quvetçiler tirenmedi. Soñki malümatqa köre, çeşit yaraları olğan 130 insan hastahanege alındı.
Qırğızistannıñ Merkeziy saylav komissiyası, 7 fayızlı baryerni keçken dört firqa parlamentke kire, akimiyetke qol tutqan «Birimdik» ve «Meken Kırgızstan» firqaları ise er biri reylerniñ tahminen 24%-ını alıp ğalebe qazandı, dep bildirdi. Olardan soñ kelgen firqa («Kırgızstan»), resmiy malümatqa köre, reylerniñ 8%-ını qazandı. Bu firqa da akimiyetke yaqın sayıla. Yekâne muhalifet firqası – «Butun Kırgızstan» milletçiler firqası – reylerniñ 7,13%-ını qazanıp parlamentke keçti.
Parlamentke keçe bilgen firqa liderleri bile saylavlarnı egri dep adlandırdı.
Qırğızistan prezidentiniñ matbuat hızmeti oktâbrniñ 6-nda saba saat 9-da devlet yolbaşçısı saylavlarda iştirak etken firqalarnıñ liderlerinen körüşecek, dep bildirdi. 16 firqa saylavlarda iştirak etti.
