Qırğızistan Telükesizlik şurası sıñırlarnı qapatmağa qarar berdi. Bu aqta Telükesizlik şurasınıñ kâtip muavini Omurbek Suvanaliyev «İnterfaks» neşirine bildirdi, dep haber ete «Nastoyaşçeye Vremâ».
Devlet sıñır hızmeti bildirgenine köre, üst seviye memurlarnı memleketten yibermemek emri keldi. «Böyle emir keldi, ve, ebet, oña riayet etecekmiz», – dep ayttı müessise vekili TASS agentligine.
Suvanaliyevniñ aytqanına köre, Qırğızistan prezidenti Sooronbay Jeenbekov ve baş naziri Kubatbek Boronovnıñ bulunğan yeri belli degil. Narazılıq aktsiyaları başlağanından berli olar körünmey, dedi o. İnternette prezidentniñ bir qaç muracaatı derc etilgen edi, amma çıqarılğan yeri belli degil.
«İş yerlerini terk etken vazifedar şahıslar gizli yerlerde buluna. Tam olaraq qayda olğanlarını aytıp olamaymız, bir çoqu saqlana. Boronov kibi soyları uzaqtan çalışıp, istifağa ketmegenini bildire. Böyle intiqamcılar çoq, bu da büyük çatışmalarğa yol aça bile», – dedi o.
Omurbek Suvanaliyevniñ bildirgenine köre, memleketniñ siyasiy vaziyeti kergin qala, siyasiy firqalar özara añlaşıp olamay. Onıñ aytqanına köre, vaziyetni kerginleştirmemek içün firqalar muzakere masası başına oturmalı.
Prezidentniñ matbuat hızmeti, Jeenbekov Bişkekte buluna ve siyasiy küçlernen şahsen muzakereler keçire, dep bildirdi.
Qırğızistanda oktâbrniñ 5-nde parlament saylavlarınıñ neticeleri ilân etilgen soñ narazılıq aktsiyaları başladı. Daa soñra ise çatışmalar oldı. Oktâbrniñ 6-na keçer gecesi numayışçılar parlament ve prezidentniñ apparatı çalışqan Beyaz evni zapt etip, bir sıra siyasetçini apisten azat etti. Prezident Sooronbay Jeenbekov memleketteki adise-vaqialarnı «akimiyetni zapt etüv ıntıluvı» olaraq kördi ve Qırğızistannıñ prezidenti olıp qala, dep bildirdi. Memlekette bir qaç siyasiy gruppa ve koordinatsion şura areket ete.
