Qırğızistan prezidenti Sooronbay Jeenbekov istifağa ketmege qarar berdi. Bu aqta prezidentniñ matbuat hızmeti bildire, dep haber ete «Nastoyaşçeye Vremâ».
«Sayğılı semetdeşler! Men akimiyetke ıntılmadım. Menim içün memleketimizniñ barışığı, halqımıznıñ birligi, cemiyetimizniñ birligi er şeyden müimdir. Qırğızistan tarihında qan aqtırğan ve vatandaşlarına ateş açqan prezident olaraq kirmege istemeyim. Şunıñ içün istifağa ketmege qarar berdim. Japarov ve diger siyasetçilerni öz tarafdarlarını barışıq yolunen dağıtmalarına çağıram», – dep qayd etti Jeenbekov yapqan beyanatında.
Jeenbekov istifa arizasını berdimi – daa haber etilmey.
Qırğızistanda eki aftadan berli parlament saylavlarından soñ başlağan siyasiy buhran devam ete. Saylavlar bir çoq qalplıq sebebinden qanunsız tanıldı. Memleketniñ parlamenti oktâbrniñ 14-nde yañı baş nazir olaraq Sadır Japarovnı sayladı, prezident Sooronbay Jeenbekov ise onı vazifede tasdıqladı.
Japarov oktâbrniñ 15-i sabasına qadar Jeenbekovnıñ istifasını talap etti, lâkin prezident tek yañı parlament saylavlarından soñ istifağa ketecek, dep bildirdi.
Oktâbrniñ 15-i sabasından Bişkekte yañı saylanğan baş nazir Sadır Japarovnıñ tarafdarları toplaştı, olar prezident Sooronbay Jeenbekovnıñ acele istifağa ketmesini talap ete.
Şaatlarnıñ bildirgenine köre, rezidentsiya yaqınlarında arbiyler ve uquq qoruyıcı organlarınıñ hadimleri buluna.
Arbiy bölükler oktâbrniñ 9-nda Bişkekte toplanıldı, bundan evel devlet yolbaşçısı paytahtta fevqulâde vaziyetni ilân etti.
