Çarşenbe künü, iyül 31-inde Qarasuvbazarda Qırım medeniy mirasınıñ saqlaması içün birleşken teşebbüs gruppasınıñ tesis toplaşuvı keçti. Bu taqım, Qarasuvbazarda bestekâr Aleksandr Spendiarovnıñ evi yıqqanlarından soñ peyda oldı, dep bildire Qırım.aqiqat mühbiri.
Tesisçilerniñ sırasına Eskender İlyasov, Leman İbraimova, Vitaliy Homutov ve Reşad Memetov kirdi.
"Bugün biz, Qırım medeniy mirasınıñ saqlaması içün birleşken teşebbüs gruppasınıñ tesis toplaşuvınıñ protokolını imzaladıq. Qarasuvbazarda Spendiarovnıñ evi yıqtırılğanından soñ, cemiyet, Ülkeşınaslıq müzeyi ile yerli akimiyet medeniy miras obyektleriniñ cedvelini tizgenini talap etti, şimdi ise şeer akimiyeti, öz qararınen olarnı yerli degerli abideler siciline kirsetmeli. Bizim teşebbüs gruppamız, bu tecribe Qıımnıñ başqa şeerlerine de tarqalsın, dep tırışacaq. Ve bu - birinci maqsatlarımızdan birisidir", - dep aytıp berdi Qırım.Aqiqatqa Reşad Memetov.
İyün 25-inde Qarasuvbazarnıñ rusiyeli memuriyetinde Spendiarovnıñ yıqılğan evi boyunca cemiyetnen muşaveresi keçti. Tedbirde yıqılğan evniñ saibi de iştirak etti, o, yañı binanıñ ögüni Spendiarov eviniñ mimariy ve bediiy üslübinde qurmaga söz berdi.
Şeerniñ rusiyeli memuriyetinde, şimdilik cemiyet ile sicilge kirsetilecek şeer obyektlerini muzakere eteler, dep bildirdiler.
Qırım ilhaqından soñ, Rusiye yarımadada olğan bütün medeniy ve tarihiy degeri olğan obyektlerni öz yurisdiktsiyasına aldı. Kyiv, abideler Ukraina halqına aittir, dep itiraz ete ve olarnı UNESCO qoruması altına almağa muracaat ete.
