Link açıqlığı

Saatnıñ esas haberi

Putinniñ temsilciligi Zelenskıynıñ Qırımnı ve Donbas topraqlarını «barışıq yolunen» qaytarmaq istegenine sert cevap berdi


Volodımır Zelenskıy ve Vladimir Putin. Kollaj
Volodımır Zelenskıy ve Vladimir Putin. Kollaj

Ukraina prezidenti Volodımır Zelenskıy BBC içün intervyü berip, «cenkni bitirip olamasa» ve «Qırım ve Donbasnı barışıq yolunen» qaytaramasa, prezident vazifesinden ayırılacaq, dep söz berdi. Rusiye prezidentiniñ matbuat kâtibi Dmitriy Peskov «Qırım problemi yoq», dep bildirdi.

«Bilesiñiz, bu menim içün problem degil. Men birden ayttım, ne reyting, de akimiyet maña kerekmey. Cenkni bitirip olamasam, memleketlerimiz arasındaki bu facialı ikâyeni bitirecek başqa insan kelmek kerek, demek», – dedi Zelenskıy, dep haber ete Azatlıq Radiosı.

Ukraina prezidentiniñ aytqanına köre, o, Rusiye prezidenti Vladimir Putinnen barışıq añlaşmasını tizip, Qırımnen beraber Ukraina topraqlarını qaytarıp olur, dep işana.

«Buña inanam. Başqa türlü olsa edi, Ukraina prezidenti vazifesine kelmez edi. Bu pek qıyın, ve mında bütün dünyanıñ yardımı kerek, bu doğru. Amma ümütimni coymayım», – dedi Zelenskıy.

Rusiye prezidentiniñ matbuat kâtibi Dmitriy Peskov Zelenskıynıñ Rusiye ile barışıq yolunen añlaşıp, Qırımnı ve Donbas topraqlarını qaytarmaq ümütine cevap berdi.

«Eñ esası – Donbas problemini çezmektir. Qırım problemi yoq, ve Rusiyeniñ bir de bir memleketlernen munasebetlerinde olamaz. Bilesiñiz, Rusiye Ukrainağa cenüp-şarq meselesini çezmesi içün yardım ete ve yardım etmege devam etecek. Minsk añlaşmalarını oquñız», – dep bildire Peskovnıñ aytqanlarını «RİA Novosti» Rusiye haber agentligi.

Donbastaki silâlı zıddiyet 2014 senesinden berli Rusiyeniñ Qırım işğalinden soñ devam ete. Ukraina ve Ğarp Rusiyeni separatistlerge silâlı yardım köstergeninde qabaatlaylar. Kreml bu qabaatlarnı red ete ve Donbasta ancaq Rusiye «göñüllileri» bar, dep israr ete.

BM malümatına köre, 2014 senesi aprel ayından başlap 2020 senesi iyülniñ 31-ne qadar silâlı zıddiyet neticesinde Donbasta 13100 - 13300 insan elâk oldı.

2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.

2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.

Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG