Qırımnıñ çoqusı rayonlarında «çetel vatandaşlarına» topraq saibi olmağa yasaq etken Rusiye prezidenti Vladimir Putinniñ buyruğı «uquq ceetinden bir şeyge yaramay». Bu aqta martnıñ 20-nde Ukraina Tış işler nazirliginiñ matbuat kâtibi Oleg Nikolenko Twitter saifesinde yazdı.
«Yarımadada devletimizniñ suvereniteti ğayrıdan tiklengen soñ kerçek saiplerniñ aqları ğayrıdan tiklenecek», – dep qayd etti Nikolenko.
Onıñ aytqanına köre, bu yasaq Rusiyeniñ basqı, ayırım ve Ukraina vatandaşlarını işğal etilgen yarımadadan çıqaruv siyasetine uyğun kele, dep haber ete Azatlıq Radiosı.
Nikolenko, Rusiye hususan halqara uquqnıñ esas norma ve printsiplerini ihmal etmege devam ete, dep qoştı. Onıñ aytqanına köre, Kremlniñ areketleri halqara toplulıqnıñ cevabını alır.
«Ukrainalılarnı Qırımda topraq damartısınıñ saibi olmaq aqqından marum etüv «Qırım platformasında» ve onıñ inauguratsion sammitinde diqqatnıñ merkezinde olacaqtır», – dep qayd etti Nikolenko.
2021 senesi martnıñ 20-nden itibaren Rusiye prezidenti Vladimir Putinniñ «çetel vatandaşlarına» Qırımnıñ çoqusı rayonında – yalı boyu ve esas Ukrainağa yaqın rayonlarda topraq saibi olmağa yasaqlağan buyruğı işke tüşürile.
Rusiye qanunlarına köre, işğal altındaki yarımadada yaşağan Ukraina vatandaşları bu kategoriyağa kirmey.
Ukraina insan aqları Helsinki birliginiñ advokatı, Ukraina halqara uquq milliy advokatlar birligi komitetiniñ azası Maksim Timoçko Qırım.Aqiqat Radiosınıñ yayınında Rusiye prezidenti Vladimir Putinniñ «topraq buyruğına» ait olğan Ukraina vatandaşları işğal etilgen Qırımda topraq damartılarını nasıl saqlaması mümkün olğanını tarif etti.
Daa evel belli olğanına köre, işğal etilgen Qırımda «Rusiyeniñ sıñır topraqlarındaki» 9747 topraq damartısı Ukraina vatandaşlarına ait.
Ukraina prezidentiniñ Qırım Muhtar Cumhuriyetindeki temsilciligi Putinniñ Qırımdaki topraq buyruğını «arbiy cinayet» dep adlandırdı. Qırım Muhtar Cumhuriyetiniñ prokuraturası Rusiye akimiyetiniñ bu areketlerini Ukraina Ceza kodeksiniñ 438-inci maddesine köre (cenk qanunları ve adetlerini bozuv) tasnif ete.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
