Kremlniñ bildirgenine köre, Rusiye prezidenti Vladimir Putin yaqın vaqıtta Ukraina prezidenti Petro Poroşenko ile Ukraina deñizcileriniñ azat etilmesi ve diger meselelerni muzakere etmege planlaştırmay, dep haber ete Radio Svoboda.
«Şunı ayta bilem ki, adiseden soñ Putin ve Poroşenko telefonda laf etmediler ve, bilgenime köre, ileri künlerde de böyle bir subet planlaştırılmay», – dedi Rusiye prezidentiniñ matbuat kâtibi Dmitriy Peskov.
Kreml vekili norman formatında (Almaniya, Rusiye, Ukraina, Frenkistan) körüşüv kerekmi sualine cevap berip, «dört memleket Minsk añlaşmalarınıñ yerine ketirilmesinen oğraşqanı» aqqında hatırlattı. Peskovnıñ aytqanına köre, Ukraina deñiz askerleri ve gemileri meselesiniñ «Minsk añlaşmalarınıñ alâqası yoqtır».
Noyabrniñ 28-nde Rusiye prezidenti yardımcısı Yuriy Uşakov bildirdi ki, Ukraina tarafından Putin ve Poroşenko telefon subeti muracaatı keldi, amma subet olmadı. Ukraina prezidenti de Rusiye liderinen bağlanmağa tırışqanını, amma faydası olmağanını bildirgen edi.
Ukraina Arbiy deñiz quvetleri bildirgenine köre, noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı.
Daa soñra belli oldı ki, FSB Qara deñizde Ukraina gemilerine qarşı silâ qullandı. Kyivniñ malümatına köre, FSB açqan ateş neticesinde altı Ukraina askeri yaralandı. Rusiye FSBsi Ukraina gemilerine qarşı silâ qullanılğanını tasdıqlap, yaralanğan üç Ukraina deñizcisi aqqında haber etti. Ukraina telükesizlik hızmeti bildirdi ki, gemilerde Ukraina deñizcilerinen beraber Ukraina telükesizlik hızmetiniñ eki hadimi bar edi.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen Ukraina deñizcilerini cenk esiri dep tanıdı.
Aqmescit ve Keriç mahkemeleri Keriç hastahanesinde bulunğan 3 yaralanğan askernen beraber 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile.
Noyabrniñ 29-nda aqşam zapt etilgen Ukraina deñizcileriniñ Aqmescit SİZOsından çıqarılğanı aqqında belli oldı. Advokat Nikolay Polozov bildirdi ki, 21 Ukraina deñiz askeri «Lefortovo» SİZOsında, üç yaralanğan asker ise Moskvadaki «Matrosskaya tişina» SİZOsınıñ lazaretinde buluna.
Noyabrniñ 26-nda Ukraina Yuqarı Radası Keriç boğazında Rusiye arbiyleri tarafından Ukraina gemilerine açılğan ateş sebebinden bir qaç vilâyette cenk vaziyetini ilân etti.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
