Rusiye prezidenti Vladimir Putin Ukrainanıñ yañı reberligi «Rusiye ile munasebetlerni yañıdan qurmağa» areket etecek, dep ümüt ete. Bu aqta «İnterfaks» Rusiye haber agentligi bildire.
Putinniñ aytqanına köre, Ukraina elitasınen munasebetler nasıl olacağına baqmadan, Rusiye ve Ukraina munasebetleri yañıdan tiklenecek, dep yaza neşir.
«Bir halqnıñ parçaları ya da eki qardaş halq arasında böyle bir şey olamaz, elitalarnen munasebetlerimiz nasıl olsa olsun, şübesiz, munasebetlerimizni yañıdan quracaqmız. Misal olaraq, keçmişniñ siyasiy elitalarnen bile, faaliyetiniñ köşe başına şahsiy muvafaqiyet, ukrain halqından qazanğan ve çetelde saqlağan şahsiy kârnı qoyğan ve paranı saqlağan insanlarnen. Bu sebepten Ğarpnı o qadar seveler, dep tüşünem. Amma yañı reberlik böyle sıñırlanmağan ve özüni serbest is ete, Ukraina halqı köstergen itibarğa işana, dep ümüt etem. Mence, o, keskin areket ete bile», – dep yaza Putinniñ aytqanlarını kütleviy haber vastası.
Ukraina müessiseleri bu beyanatnı şimdilik izaatlamadı.
Ukraina prezidenti Volodımır Zelenskıynıñ memuriyet yolbaşçısı Andrey Bogdan Rusiye ile barışıq añlaşmalar meselesiniñ referendumğa çıqarılması muzakere etile, dep haber etken edi.
2014 senesi mart ayında Rusiye Ukrainağa ait Qırım yarımadasını işğal etti. Bir qaç aftadan soñ Donbasta Ukraina ve Rusiye tarafından desteklengen boyevikler arasında silâlı zıddiyet başladı. Neticede, BM 2018 senesiniñ soñunda bergen malümatqa köre, aman-aman 13 biñ insan elâk oldı.
