Rusiye uquq qoruyıcıları Qırımda Yedi Quyu qasabasınıñ sakinlerine tintüvnen keldi, dep bildirdi Rusiye tarafdarı bloger Aleksandr Talipov. O, Telegram kanallarında video derc etti.
Onıñ malümatına köre, balalarını özü baqqanını aytqan qasaba sakini Olga Dibrova rusiyelilerni ve Kreml yolbaşçısı Vladimir Putinni sögip, onı «hırsız» dep adlandırdı. Tenqit sebeplerinden biri – eki ayğa kesilgen elektrikler.
Berilgen malümatqa köre, Olganıñ oğlu Andrey video çatlarında Rusiyedeki seferberlikni tenqit etip, Rusiye ordusında askerlik yapmaycaq, çünki «satqın degil», dep bildirgen eken
Talipov bildirgenine köre, şahıslarğa qarşı Rusiye ordusını «itibardan tüşürüv», «cemaat nizamını bozuv», «hadimniñ emir ve talaplarına riayet etmeme» maddelerine istinaden protokollar tizildi, sıñırlav tedbirleri baqıla.
Bundan ğayrı, cinaiy dava açıluvınen bağlı «ekspertiza keçirile». Dibrovalar tutuldımı belli degil. Tintüv vaqtında «afu sorağanları» videoğa çıqarıldı.
Rusiyede ve işğal etilgen topraqlarda Ukrayinanı desteklegen faallerniñ taqip etilmesi devam ete. Rusiyege qoltutqan bloger Aleksandr Talipov Telegram kanalında Ukrayina tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını «itibardan tüşürgeninde» qabaatlanıp, memuriy ve cinaiy mesüliyetke çekile. Ukrayina prokuraturası Talipovğa qarşı «milletlerara nefret doğuruv» maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
