Aqmescitli teşebbüs gruppası Rusiye prezidenti Vladimir Putinden Aqmescitteki ukrain gimnaziyasını ve yarımadada ukrain mekteplerini ğayrıdan tiklemesini rica ete.
Bu aqta 2020 senesi fevralniñ 20-nde çıqqan Qırımdaki «Kommunistı Rossii» bölüginiñ «İskra pravdı» gazetasında aytıla, onı ukrainalı halqara uquqçı Boris Babin aydınlattı.
Metinde 2014 senesinden soñ Qırımdaki Rusiye akimiyeti ukrain mekteplerini, ukrain gazetasını ve ukrain teatrini qapattı, dep aytıla.
«Qırımda ukrainlerniñ etnotsidi başlandı, olarnıñ qonuşuv, medeniyet, din aqları bozula», – dep aytıla maqalede.
Müellifler, «Qırımda mektep, derslikler ve serbest ders bergen ocalar olmasa, balaları tuvğan ukrain tilinde nasıl laf etecek», dep soray.
2019 senesi Qırım aq qorçalayıcı gruppası, yarımadada bir dane ukrain mektebi qalmadı, dep bildirdi. Ukrain tilinde ders bergen sınıflar Qırımnıñ Rusiye akimiyeti bildirgeninden qat-qat azdır. Qırımtatar tilinde tasil bergen mektepler olaraq tanıtılğan mektepler asılında öyle degil, dersler em qırımtatarca, em rusça keçirile, dep qayd etti Qırım aq qorçalayıcı gruppası.
Qırımnıñ Rusiye Tasil nazirliginiñ malümatına köre, yarımadada qırımtatar tilinde ders bergen 15 mektep ve ukrain tilinde ders bergen bir mektep çalışa, 27 mektepte qırımtatar tilinde ders berilgen 126 sınıf ve ukrain tilinde ders bergen 8 sınıf çalışqan 5 mektep bar.
Qırımtatar Milliy Meclisiniñ azası Eskender Bariyevniñ bildirgenine köre, yarımadada qırımtatar tilinde ders bergen 16 mektepten yedisi qaldı. İşğalden soñ yarımadada qabul etilgen yañı «anayasanıñ» 10-uncı maddesi ise qırımtatar, ukrain ve rus tillerine devlet statusını bere.
Ukrainanıñ sabıq Tasil ve İlim naziri Liliya Ğrınevıç, Rusiye işğal etken Qırımda ukrain ve qırımtatarlarnıñ ana tilinde tasil almaq aqqı bozula, dep ayttı.
