Ukraina ve Rusiye arasındaki muzakerelerde «ciddiy bir ilerilev» olmadı. Bu aqta martnıñ 21-nde Kreml spikeri Dmitriy Peskov bildirdi.
Selektor toplaşuv vaqtında jurnalistlernen laf etken Peskov muzakerelerde «ciddiy bir ilerilev» olmalı, dep ayttı. Soñra Rusiye prezidenti Vladimir Putin ve Ukraina prezidenti Volodımır Zelenskıynıñ körüşüvi ola bile.
Rusiyeniñ Ukrainağa qarşı cenkini toqtatuv meselesinde aracılıq yapmağa tırışqan İsrail baş naziri Naftali Bennet bugün belli bir ilerilev olğanına baqmadan, taraflar arasında büyük zıddiyetler qala, dep ayttı.
Zelenskıy martnıñ 20-nde CNN intervyüsında Putin ile muzakerelerge azır, dep bildirdi. O, bu muzakereler muvafaqiyetsiz olsa, «üçünci cian cenki» olacaq, dep tenbiledi.
«Onen muzakerelerge azırım. Soñki eki yıl devamında azır edim. Mence, bu cenk muzakeresiz bitmeycek», – dedi Zelenskıy.
Prezidentniñ aytqanına köre, Ukraina bu muzakerelerde iç bir vaziyette topraq bütünligini bozmaycaq.
Onıñ qayd etkenine köre, Ukraina NATOda olsa edi, Rusiye ücüm etmez edi.
Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti. Bundan soñ Kyiv, Harkiv, Odesa, Kramatorsk, Berdânskta patlav ve raketa darbeleri aqqında haber etildi.
Ukraina prezidenti Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete. Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire.
Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire. Başta Rusiye arbiyleri ölgenini inkâr ettiler. Amma fevralniñ 27-nde Rusiye Federatsiyası Mudafaa nazirliginiñ resmiy vekili İgor Konaşenkov Ukrainada ölgen ve yaralanğan Rusiye askerleri bar, dep ayttı. Sayısını aytmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://ddqp4xjpo7z2y.cloudfront.net/ . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
