Rusiye prezidenti Vladimir Putin Ukrayina cenkini toqtatacağı aqqında añlaşmağa istemey, amma halqara izolâtsiyasını toqtatmaq içün çetel liderlerinen böyle subetler keçirmege istey, dep bildirdi Ukrayina lideri Volodımır Zelenskıy.
«Mence, Putin barışıq istemey, amma bu liderlerden birinen (muzakere masası başına – QA) oturmağa istemey demek degil. Çünki onıñ içün siyasiy izolâtsiyanıñ bozuluvıdır. Onıñ içün elverişli bir şey – oturmaq, laf etmek ve añlaşmamaq. Çıqıp olamay, laf etmek ise bir yerge barmaqtır, demek, bunıñ blokunı toqtatmaq kerek. İzolâtsiyanıñ bozuluvıdır… bu siyasetçi olaraq Putinge qarşı izolâtsiya toqtatıluv adımlarıdır», – dep qayd etti prezident «Ukrayinske radio» intervyüsında.
Zelenskıynıñ aytqanına köre, Kreml yolbaşçısı içün bizim tarafımızdan kapitulâtsiya şartlarında muzakere kerek, amma bunı oña kimse bermez.
Rusiye ve Ukrayina arasında muzakereler aqqında laflar Donald Trump ABDniñ yañı prezidenti olaraq saylanğan soñ yañıdan başlandı.
Saylav teşviqatı vaqtında o, Ukrayinadaki cenkni tez bitirecek dep, çoq aytqan edi. Aynı vaqıtta çeşit matbuat vastalarından menbalar Trumpnıñ açıq planı olmağanını iddia eteler – zıddiyet eki tarafnıñ da uzlaşuvları esasında yekünlenmeli.
ABDniñ şimdiki memuriyetiniñ fikri şunda ki, Rusiyenen barışıq şartları aqqında er angi qarar Ukrayina akimiyeti tarafından qabul etilmek kerek. ABD istilâğa qarşı küreşte Ukrayinağa «kerek olğance» yardım etmege azır, amma Amerika arbiyleri uruşlarda doğrudan-doğru iştirak etmey.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
