Rusiye prezidenti Vladimir Putin, 2018 senesei noyabrde Qırım yalısı yanında zapt etilgen ukrain deñizcilerniñ "meselesini iş rejiminde" çezmege istegenini ayttı.
"Biz raat, iş rejiminde bu meseleni çezermiz", - böyle dep Putin, ukrain deñizcilerni evlerine qaytarmaq Ukraina prezidenti Volodımır Zelenskıynıñ çağıruvını tefsir etti, dep yaza TASS.
Bundan ğayrı, Putin, ukrain deñizcilerniñ azat etilmesi ve Rusiyeniñ PACEge qaytması arasında alâqa yoq, dep ayttı.
"Olar (ukrain deñizciler - QA) Rusiye qanunını bozdı, bunıñ içün raatm iş rejiminde bu meseleni çezmek kerek", - dedi Putin.
Bundan evel Ukraina prezidenti Volodımır Zelenskıy, 2018 senesei noyabrde Qırım yalısı yanında zapt etilgen 24 ukrain deñizcilerni azat etmege Rusiye prezidenti Vladimir Putinni çağırttı.
"Men Rusiye prezidenti Vladimir Putinge muracaat etmege isteyim: er kesimizniñ balası bar. Ana-babalarğa balalarını qaytarıñız", - dedi Zelenskıy Kyivde briefingde.
Bugün Putin, AQŞ prezidenti Donald Trump ile G-20 sammitinde zapt etilgen deñizcilerniñ mevzusı köterilgenini bildirdi, amma bu meseleniñ şimdilik çezülivi yoq, dep qoştı.
