Rusiye prezidenti Vladimir Putin Ukraina prezidenti Volodımır Zelenskıynen Parijde «normand sammiti» teneffüsinde körüşken soñ neticelerden memnün qalğanını bildirdi, dep haber ete Rusiye haber agentlikleri Parijden.
Körüşüv nasıl keçti ve memnün qaldımı sualine Putin şöyle dedi: «Yahşı. Memnün qaldım».
İnglizce de qoştı: «Yes, I'm happy» («E, men bahtlım»).
Berilgen malümatqa köre, eki memleketniñ eyyet azalarınen beraber eki taraflı körüşüv tahminen bir saat devam etti. Zelenskıy ve Putin 5-10 daqqa birge bir laf ettiler.
Körüşüvniñ mevzu ve neticeleri, em de Zelenskıynıñ teessuratları aqqında bir malümat şimdilik yoq, dep haber ete Azatlıq Radiosı.
Rusiye agentlikleri, eki taraflı körüşüvde Rusiye tarafından energetika naziri Aleksandr Novak ve «Gazprom» yolbaşçısı Aleksey Miller, Rusiye prezidentiniñ yardımcıları Vladislav Surkov ve Yuriy Uşakov, Rusiye Tış işler naziri Sergey Lavrov ve Kreml spikeri Dmitriy Peskov iştirak ettiler, dep yaza.
Ukraina tarafı, bu körüşüvde iştirak etken eyyet azalarınıñ adlarını daa aydınlatmadı.
Al-azırda «normand dördü» liderleriniñ brifingi ve umumiy beyanatınıñ ilân etilmesi beklenile.
Bundan evel «normand dördüniñ» muzakerelerinde Zelenskıy ve Putinniñ körüşüvi içün teneffüs berilgen edi.
Parijde dekabrniñ 9-nda aqşam Ukraina, Rusiye, Frenkistan ve Almaniya liderleriniñ körüşüvi başlandı.
Ukraina prezidenti Volodımır Zelenskıy, Frenkistan prezidenti Emmanuel Macron, Almaniya kantsleri Angela Merkel ve Rusiye prezidenti Vladimir Putin Yelisey sarayında dört taraflı muzakerelerni keçireler.
Aynı vaqıtta, Ukraina prezidentiniñ ofisi ögünde tünevinden berli aktsiya keçirile. Onıñ iştirakçileri Volodımır Zelenskıyden «Ukrainanıñ teslim» adımlarını atmamağa ve Kreml ile Donbastaki Rusiye gibrid quvetleriniñ qanunlaştırıluvınen bağlı uzlaşuvğa razı olmamağa çağıra.
Donbastaki silâlı zıddiyet 2014 senesinden berli Rusiyeniñ Qırım işğalinden soñ devam ete. Ukraina ve Ğarp Rusiyeni separatistlerge silâlı yardım köstergeninde qabaatlaylar. Kreml bu qabaatlarnı red ete ve Donbasta ancaq Rusiye «göñüllileri» bar, dep israr ete.
BM malümatına köre, 2019 senesi oktâbrniñ 31-ne qadar silâlı zıddiyet neticesinde Donbasta 13000 - 13200 insan elâk oldı.
