Rusiye prezidenti Vladimir Putin yaqınları arasında Qırım ilhaqı hata olğanını tanıdı, amma bunı açıq şekilde tanımağa niyeti yoq. Bu aqta qırımtatar halqınıñ lideri Mustafa Cemilev «Prâmıy» ukrain telekanalınıñ yayınında ayttı.
«Putinniñ başqa çaresi yoq artıq. Söz sırası, şimdi çeşit hızmetler fikrimizni soray: Putin betini coymayıp, Qırımdan kete bilemi? Böyle bir imkân yoq. Ya Putin hata yapqanını tanıması mümkünmi? O, yaqınları arasında bunı ayta endi. Teşkerilgen menbalar bar. «Qırımnen hata yaptıq, amma bunı yapmaycaqmız», dep ayta. Mına böyle qavrayış», – dedi Mustafa Cemilev.
Cemilevniñ fikirince, Putin içün Qırımdan ketmek «harakiri yapmaq» kibi bir şey.
Yarımada işğalinden soñ Putin Qırımnıñ kimge ait olğanı meselesi «qapalı» ola, dep bir qaç kere aytqan edi.
Martnıñ 18-nde Rusiye prezidenti Vladimir Putin Aqyarğa keldi. O, işğal etilgen Qırımda Siemens turbinalı eki elektrostantsiyasınıñ işke başlamasını buyurdı. Videoda onıñnen beraber Tavriya issilik elektrostantsiyası ve Tamandaki «Port» alt stantsiyasınıñ mütehassısları bar edi.
Daa soñra Putin Aqmescitteki kontsertte sözge çıqıp, Qırım işğali vaqtında qırımlılarnıñ areketlerini Ekinci cian cenki başında Qızıl ordu askerleriniñ areketlerinen qıyasladı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
