Ukraina Prezidentiniñ Qırım MC-deki daimiy temsilcisi Anton Körineviç Gaagada BMT-nıñ Halqara mahkemesinde sözge çıqqan zamanı Rusiye, onıñ siyasiy reberligi ve arbiyleri Ukrainada insanlıqqa qarşı cinayetler ve arbiy cinayetler yapqanını bildirdi. Bunı temsilcilik öz facebook saifesinde haber etti.
"Putin yalan ayta, ukrainler ise öle. Soyqırımnı yapqan Ukraina degil. Bunı yapqan Rusiyedir, onıñ siyasiy reberligi ve arbiyleri. Olar insanlıqqa qarşı cinayetler ve arbiy cinayetler yapa. Soñki eki aftada bir çoq insandan Ekinci cian cenki aqqında eşitem. Rusiye Ukrainanıñ "denatsifikatsiyası" aqqında bildirip, Holokostnıñ hatırasını utanmazca lekeley", - dedi Körineviç.
Onıñ sözlerine köre, "soyqırım suçlavını sahtelep" Rusiye "Soyqırım aqqında Şartnameni aramlay".
"Rusiye Ukrainanı soyqırım ile suçlay. Ukraina bu suçlamalarğa qarşılıq bildire ve biz olarnıñ esassız olğanını isbatlarmız. Rusiye, mevcut olmağan bir soyqırımnı toqtatmaq içün suveren bir devletni işğal ete bilecegini bildire. Ukraina bu esassız bildirüvni red ete", - dedi o.
Ukraina prezidentiniñ temsilcisi Rusiyege muracaat etti: "Keliñiz, bu tartışmanı medeniy devletler kibi al eteyik. Silâlarıñıznı qaldırıñız ve delilleriñizni kösteriñiz. Ukraina bu mahkemeniñ salâhiyetini tanıy ve qararlarına riayet ete. Rusiye de aynı yapmaq kerek".
Körineviç, Rusiye öz isteginen halqara uquq qaidelerine riayet etmege istemese, BMT-nıñ Halqara mahkemesiniñ areket etmege aqqı bar, dep qoştı
"Rusiyeni toqtatmaq kerek ve mında mahkemeniñ vaziyesi bayağı müimdir. Şunıñ içün Ukraina halqı, Ukraina ükümeti, Ukraina prezidenti keçici tedbirlerniñ tayin etilmesi aqqında talabımıznı qanaatledirmege ürmet ile istey", - dedi o.
Martnıñ 7-nde Gaagadaki BMT-nıñ halqara mahkemesinde Ukrainanıñ Rusiyege qarşı soyqırım suçlavı ile davası üzre diñlevler başlandı. Rusiye temsilcileri diñlevlerde iştirak etmedi.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete. Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
