Moskvanıñ daa mart ayında cenkni toqtatmağa azır olğanı ile bağlı bildirmeleri "açıq yalan" ve "rus propagandasınıñ nevbetteki sahtelemeleridir". Bunı Ukrayin TİN spikeri Oleg Nikolenko bildirdi.
"Alâ daa Putin ile dialogğa inanğan bazı ğarbiy erbaplar Rusiyege aytışmalar kerek olmağanını añlamaq kerekler. Rusiye tunçlıqnı istemey. Rusiye ukrayinlerni yoq etmege tırışa. Dmıtro Kulebanıñ evel qayd etkeni kibi, Ukrayinağa yardımnıñ keçikmesi yalıñız Rusiye rejimine Ukrayinağa qarşı tecavuz içün daa keniş yer bere. Onı, Ukrayinanıñ öz topraqlarını mudafaa etmek içün qullana bilecek RSZO ve diger ağır silâlar, Rusiyeniñ ihracına yasaq ve gaz embargosından ibaret olğan daa qattı halqara sanktsiyalar toqtatacaq", - dep yazdı o Facebookta.
Daa evel "İzvestiya" Rusiye neşri adınıñ açıqlanmasını istemegen subetdeşine atfı etip, dersiñ Moskva mart ayında Antaliyada aytışuvlar vaqtında cenkni toqtatmağa azır olğanını bildirdi.
"O vaqıt Ukrayina özü Donbas ve Qırımnı qoşmadan neytral status ve telükesizlik kefaletini teklif etti. Vladimir Putin buña razı olmağa azır edi, amma Ğarp Ukryinağa tazyıq etti ve Kıyiv öz teklifinden red etti", - dep yazdı neşir.
Ukrayina TİN spikeri buña "açıq yalan" dedi ve o zaman Antaliyada Dmıtro Kuleba tek bir sual - gumanitar koridorlarnıñ açıluvını kötergenini qayd etti.
"Neşirniñ subetdeşi Rusiye propagandasınıñ daa bir sahteligidir. RF Ukrayinağa qarşı cenkni devam etmek içün sebep qıdırıp, Herson ve Zaporijjâ vilâyetleriniñ zapt etilgen bölgelerinde nevbetiy qanunsız assimilâtsiya içün temel azırlay", - dep qayd ete Nikolenko.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
