Kreml, Rusiye ve Ukraina prezidentleri Vladimir Putin ve Volodımır Zelenskıy Türkiyede körüşe bileler, dep bildirdi. Amma şimdilik bu meselede bir añlaşma yoq, dep qayd etile.
«Kimse bunı inkâr etmey. Prezident (Rusiye – muar.) bir iş içün er kesnen körüşmege azır, amma neticede ne olacaq ve neler muzakere etilecek añlamaq kerek, dep bildirgen edi. Şimdilik bular belli degil», – dedi Peskov.
Türkiye prezidentiniñ spikeri, Recep Tayyip Erdoğan Ukraina ve Rusiye prezidentleri Volodımır Zelenskıy ve Vladimir Putinnen laf etip, ekisini de Türkiyede körüşmege davet etti, dep bildirdi.
Erdoğannıñ vekili, Türkiye «aqibetleri büyük ve eskisi kibi olmaycaq er angi cenk areketlerine yol bermemek içün» Rusiye ve Ukraina arasında kerginlikni eksiltmek içün rol almağa azır, dep bildirdi.
Ukraina prezidentiniñ ofisi Azatlıq Radiosına bildirgenine köre, Türkiye prezidenti Recep Tayyip Erdoğannıñ Rusiye ve Ukraina prezidentlerini muzakerege davet etmek teşebbüsi yañı degil.
«Türkiye Bir-eki ay evelsi de davet etken edi, ve Rusiye böyle format olarğa meraqlı degil, dep cevap berdi endi», – dep ayttı prezident Volodımır Zelenskıynıñ spikeri Sergey Nikiforov.
Onıñ aytqanına köre, Zelenskıynıñ böyle körüşüvlernen bağlı fikri deñişmey: «Ukraina ABD vastalığı, Türkiye vastalığı ile er angi formatta laf etmege azır. Neticesi olacaq er angi format ola bile».
