Kremlde Rusiye ve Türkiye prezidentleri Vladimir Putin ve Recep Tayyip Erdoğannıñ körüşüvi başlandı, dep haber ete Azatlıq Radiosı.
Vladimir Putin, Recep Tayyip Erdoğan ile muzakerelerniñ esas mevzusı Suriyeniñ İdlib vilâyetiniñ vaziyeti olacaq, dep bildirdi. Soñki künleri anda Türkiye askerleri ve Rusiye desteklegen Suriye prezidenti Başar Asadnıñ ordusınen silâlı çatışmaları kete.
Putin, Erdoğanğa hitap etip, İdlibteki vaziyet «tekrarlanmasın» ve «Rusiye-Türkiye munasebetlerini bozmasın» dep, «bugünki künde olğan vaziyetni laf etmek» kerek, dep ayttı. Rusiye prezidenti Suriyede Türkiye arbiyleriniñ elâk olğanı munasebetinen taziyeler bildirip, Suriye ordusı aselet darbe endirmedi, dep ayttı.
Türkiye prezidenti, Putin ile muzakerelerniñ neticeleri «İdlibteki vaziyetni qolaylaştıracaq», dep ümüt etkenini bildirdi.
Erdoğannıñ aytqanına köre, körüşüv İstanbulda olacaq edi, amma Rusiye Anayasasınıñ tüzetüvleri üzerindeki iş sebebinden Türkiye tarafı olarnı Moskvağa keçirmege razı oldı.
Muzakereler ne vaqıt bitecek – belli degil.
Türkiye ve Rusiye Suriyedeki zıddiyette cenkleşken taraflarğa qoltuta – silâlı muhalifetke ve Asadnıñ ükümetine. Asad quvetleriniñ İdlibke ücüm etenini Türkiye daa evel Rusiye ile tizilgen barışıq añlaşmalarınıñ bozuluvı dep saya. Prezidentlerniñ muzakereleri ögüne taraflar bir sıra sert beyanatını bildirdi. Aynı vaqıtta Türkiye, askerleriniñ ölüminde Rusiyeni dos-doğru qabaatlamadı.
Uruşlar Suriyede soñki künleri devam ete. Türkiye arbiyleri Asadqa qarşı çıqqan quvetlerge toplarnen ve aviatsiyanen yardım ete, Türkiye arbiyleri Suriye arbiy ava quvetlerine ait bir qaç uçaqnı tüşürdi.
